Ibandla leMDC Alliance selisole kakhulu eleMDC-T ngokuvotela ukupasiswa kokuguqulwa kwesisekelo sombuso welizwe kudale leSenate izolo libambisane lamalunga eZanu PF.
Amalunga eMDC-T alitshumi lanye avote laweZanu PF evuma ukwamukela ukuguqulwa kwesisekelo sombuso lokhu phansi kweConstitutional Amendment Bill No. 2.
Bonke abayivoteleyo liBill bangamatshumi ayisithupha lanhlanu, 65, kuthi abavote besala ukuyamukela balitshumi, njalo bagoqela yena umholi weMDC-T uMnu Douglas Mwonzora, uMorgan Komichi, uKhaliphani Phugeni labanye.
Abazi ngokwenzakalayo bathi uMwonzora ubezama ukuvala abantu amehlo ngokwala ukwamukela liBill ngoba ubevele elaye amanye amalunga ebandla lakhe ukuthi ayivotele encedisane leZanu PF.
Abasola liBill bathi inikeza uMongameli Emmerson Mnangagwa amandla amanengi agoqela ukukhetha abasekeli bakhe, bona ekade bemele bekhethwe nguzulu phansi kwesisekelo esikhona.
Imupha njalo amandla okukhetha abahluleli bemithethwandaba ephezulu bengazange bevivinywe nguzulu kanti usevunyelwa njalo lokubaqhelisela amakontilaha lanxa isikhathi sabo sempentsheni sesifikile.
Kunsukwana ezizayo ukhangelelwe ukuqhelisa ekamahluli omkhulu uChief Justice Luke Malaba.
Umgcinisihlalo weMDC Alliance enyakatho yeMatabeleland uMnu Prince Dubeko Sibanda utshele iStudio 7 ukuthi ukuguqulwa kwesisekelo sombuso lokhu kubuyisela ilizwe emuva.
Kodwa isikhulumeli seMDC-T uMnu Witness Dube uthi ibandla lakhe belilaye amalunga alo ukuthi engayivoteli liBill. Khepha uthi amalunga awesifazana ayivotele ngoba esithi iyawathuthukisa.
IBill le isisiya kuMongameli Mnangagwa ukuze ayisayine ibe ngumthetho.