amalinks wokungena

Breaking News

MDC Alliance: UGogo Chamisa Ungcatshwa NgoLwesithathu koGutu


Imfa kaGogo Chamisa

Inkokheli yamabandla ezombusazwe ehlukeneyo imanyane lozulu weZimbabwe ukukhalela imuli yakoChamisa ngemva kokulahlekelwa okukhulu, ngokubhubha kukaGogo Chamisa ngoMvulo yantambama, emzini wakhe koGutu.

Umuyi uGogo Chamisa bekungunina womkhokheli webandla eliphikisayo eleMDC Alliance, umnumzana Nelson Chamisa.

Emazwini akhe enduduzo awathumele enkundleni yokukhulumisana yebulenjini eyeTwitter, uMongameli Emmerson Mnangagwa uveze ukudana okukhulu ngemfa ka Gogo Chamisa esithi bayamthandazela uMnu. Nelson Chamisa ngalesi sikhathi esinzima esehlele imhuli yakhe.

UNkosazana Thokozani Khuphe umkhokheli webandla leMDC-T, laye uthumele amazwi akhe enduduzo kwabomdeni kaChamisa ngandlela yinye eyeTwitter esithi makalale ngokuthula uGogo njalo ebathandazela.

Inkokheli yeMDC Alliance esedale lephalamende ithi ibuhlungu ngokulahlekelwa ngumama wenkokheli yomzabalazo weZimbabwe. Omunye wabo ngunkosikazi Phyllis Ndlovu ongu Senator we MDC-Alliance esigabeni seMatabeleland North edale lephalamende.

“Sithanda ukuletha ukudana okukhulu kakhulu ngokulahlekelwa ngumama wethu, umama owasizalela iqhawe lethu u Advocate Nelson Chamisa. Bakithi, uNkulunkulu uyapha, uNkulunkulu uyathatha njalo yonke into ilesikhathi sayo. Ngitsho lokho kini lonke bomama eZimbabwe, ubusuku behlile emulini yako President, asibeni laye, simonge azizwe esele labomama.”

Ukhuthaza ukubambana kwamalunga ebandla elikhokhelwa nguChamisa le MDC Alliance unkosikazi Ndlovu.

“Njalo kubandla ngithi asibambaneni sibe moya munye sakhe isizwe sethu. Siyakwazi ukuthi umuzi ongela mama bakithi awula sithunzi. Ngakho ke bakithi ngicela ngamandla wonke ukuthi sibambaneni. Emulini yako Chamisa bakithi, silani ngezikhathi zonke zokudubeka. Ebandleni bakithi asibambaneni, ngiyacela simonge umtanethu sibe laye ngezikhathi zonke.”

Unkosikazi Siphiwe Ncube yena onguSenator wesigabeni sakoBulawayo laye uphosele awake amazwi enduduzo.

“Kubuhlungu ukulahlekelwa ngumzali, umama ubengayisuye umuntu okungathiwa usekhulile kakhulu kodwa yikuthi ukufa kuyafika noma kubani. Siyakhala sithi President lemuli yonke yakoChamisa, duduzeka. Siyakwazi ukubana lihlukuluzekile ngesikhathi esinzima kangaka phakathi kokugulelwa ngumama kumbe ugulile umama kumbe kube yi sudden death,”

Uchaze umuyi njengomuntu obengumama webandla kanye lesizwe uSenator Ncube.

“Umama asiselaye, silahkelwe ngumzali, besimthanda kakhulu. Beliseselethuba elihle empilweni lokuba lomzali kodwa bakithi osekwehlile sokwehlile akulanto esingayenza. Njengemuli ye MDC lemuli, thina njengemuli yakoNcube sikhala lani, sithi hawu bakithi kubuhlungu kodwa akulanto esingayenza. UMlimu ubesiphile umzali, usehambile.”

Umnumzana Steven Moyo isakhamuzi saseHarare, ngomunye wabaveze ukuthinteka ngemfa kaGogo Chamisa.

“Sibuhlungu kakhulukazi ngalokho osekwenzakele, ukubhubha kukaGogo Chamisa. Lapho akhona uChamisa sithi sikhala laye, kaduduzeke. Yiyo indlela yethu sonke.”

Unkosikazi Tamary Nyoni waseHwange laye wethule awakhe amazwi enduduzo kwabomdeni kaChamisa.

“Ngilusizi ngokuzwa ngokulahlekelwa kwenu ngumama, sengathi iNkosi ingaliphathisa imuli yonke, lithole induduzo evela kuMlimu. Duduzekani bathandekayo, izinhliziyo zenu mazingakhathazeki kakhulu. Njalo utshilo uMbhalo ukuthi yonke into ilesikhathi sayo. Ngakho ngithi makalale ngokuthula umama.”

Inkokheli yeMDC Alliance eyezigaba ezehluekeneyo iphakathi kokuqoqa izimota lamabhasi okuthwala abantu abaya esililweni. Umbuthano omkhulu usemzini wakhe koGutu. EHarare lapho okuhlala khona uChamisa abantu bebebuya nje, ukuzomkhalela bemduduza kodwa kungela mbuthano. Sikhuluma kunje abantu sebesuka eHarare lakuzigaba ezitshiyeneyo zelizwe belubhekise koGutu ukuyaphatheka emgcwabeni kaGogo Chamisa.

Ukhangelelwe ukungcwatsha ngabo 10 ekuseni, kusasa ngoLweSithatu mhla ka 8 Ntulikazi, uGogo Chamisa, emzini wakhe ose Chidyamakuni Village, esiqintini sako Makwirivindi koChiwara esiqintini sakoGutu, eMasvingo.

Facebook Forum

XS
SM
MD
LG