UMongameli Emmerson Mnangagwa ugcizelele ngoLwesithathu eceleni komhlangano wedale leCentral Committee yeZANU PF ukuthi akusoze kubelohulumende womanyano lebandla leMDC ngoba akudingeki lokhu njengoba ibandla lakhe lanqoba ngesilinganiso esiphezulu kukhetho.
Lokhu kwenzakala umsekeli kamongameli Mnangagwa uMnu. Kembo Mohadi laye esanda ukutsho amazwi afanayo.
Umkhokheli webandla leMDC uMnu. Nelson Chamisa uthi udaba lokuthi owanqoba okuqotho kukhetho olwedluleyo phakathi kwakhe loMnu. Mnangagwa alucacanga, okuyikho okubangela ukuthi umnotho welizwe ungathuthuki.
Ngalokho, uthi kufanele umongameli Mnangagwa akhulumisane lebandla lakhe, kubunjwe uhulumende owesikhatshana oweNational Transitional authority, kusalungiselelwa olunye njalo ukhetho.
UMnu. Nkululeko Sibanda, isikhulumeli sikaMnu. Nelson Chamisa uthi ibandla leMDC lalo alifuni uhulumende womanyano ngoba wehlula aze ebunjwe lowayekhokhela leli ibandla umuyi uMnu. Morgan Tsvangirai ngomnyaka ka 2009.
