Ibandla leMDC lithi lizabeka omabonakude emigwaqweni, abazahlola ukuthi kutshengiselwa ngemfanelo kungeladlakela ngoLwesihlanu oluzayo njalo iziphathamandla zalelibandla zizaphuma ngobunengi bazo zihlola ukuthi abantu bafola ngokuthula.
Embikweni eliwethule ngeSonto, ibandla leli lithi lisola iziphathamandla zebandla leZANU PF ezibalisa oMnumzana Cain Mathema, Pupurai Togarepi, Energy Mutodi, lo Victor Matemadanda, ngokuzama ukuphazamisa amalungiselelo awokutshengisela ngamazwi atshiyeneyo.
Ibandla leMDC ithi banengi abathembise ukulixhasa kulokhu ukutshengisela, ababalisa izisebenzi, abamabhizimusi, abenkonzo sokholo, abesifazana, inhlanganiso ezizimeleyo, labanye.
Amapholisa athi asahlolisisa isicelo seMDC esokutshengisela andubana ebaphe imvumo.
Inhlanganiso yeNational Peace and Reconciliation isixwayise ukuthi kutshengiselwe ngokuthula kungalinyazwa abengenelisiyo ukuzivikela, ababalisa abantwana, abesifazana, kanye labagogekileyo njengensukwini.
Kusenjalo isikhulumeli seMDC koBulawayo uMnu. Swithern Chirowodza uchasisela uChris Gande weStudio7 ngamalungiselelo okutshengisela kwalelidolobho.
Isiphathamandla senhlangnaiso yeCenter for Public Policy uMnu. Mfundo Mlilo uthi inengi lithwele amagabha avuzayo ngenxa yomnotho welizwe ongamanga kuhle, okuzabangela ukuthi lixhase ibandla leMDC ekutshengiseleni.