Ibandla leMDC-T lithi amalunga alo awesifazane yiwo avotele ukuguqulwa kwesisekelo sombuso welizwe kudale leSenate izolo ndawonye laweZanu PF ngoba esithi lanxa linguquko ilokubi, kukhona okuqakathekisa izifiso zawo.
Idale leli livotele linguquko ngamavoti angamatshumi ayisithupha lanhlanu, 65, kuthi abavote bephikisa lumthetho balitshumi nje kuphela.
Kutsho ukuthi iConstituional Amendment Bill No. 2, yona eyapasiswa lidale leHouse of Asssembly kunsukwana ezedluleyo, isisiyasayinwa nguMongameli Emmerson Mnangagwa ukuze ibe ngumthetho ongene kusisekelo sombuso welizwe.
Lanxa liBill imumethe inhlamvu ezithuthukisa inani labesifazane ezikhundleni ezifana lephalamende lakumakhansili ileminye njalo imigqa esolwa ngabanengi efana lokuthi uMongameli welizwe usezazikhethela abehluli bedale eliphakemeyo lokubengezelela isikhathi sokusebenza lanxa bayabe sebenelise iminyaka yokuyaphumula.
Isikhulumeli seMDC-T uMnu. Witness Dube utshele iStudio 7 ukuthi abesifazana laba bavotele ukupasisa liBill lanxa nje ibandla belilaye amalunga alo wonke ukuthi engayivoteli.
