Amanye amalunga ebandla leMDC-T elikhokhelwa nguMnu. Nelson Chamisa koBulawayo athi kulokuqilibezela kukhetho lwama primaries kulelidolobho, ngenjongo yokuthi kunqobe abakhuluma ulimi lweSiShona phambi kwalabo abakhuluma olweSiNdebele, kumbe ezinye indimi zabadabuka eMatabeleland.
Inkokheli yalelibandla koBulawayo engafunanga ukuqanjwa ngegama ikuvumile lokhu.
Ngakwelinye icele, amalunga alelibandla, agoqela abamela izigaba ezitshiyeneyo zelizwe edale lephalamende abanqotshiweyo kukhetho lolu bathi inkokheli yeMDC-T izilethela abantu ebafunayo abangakhethwanga ngumphakathi.
Ukuze sizwe okunengi ngaloludaba, sixoxe loMnu. Mqakatheki Ndlovu, ilunga lalelibandla eMagwegwe.
UMnu. Ndlovu uthi okumangalisayo yikuthi uMnu. Chamisa ngokwakhe nguye okhankasela uhlelo lwe devolution emhlanganweni yama rallies.
“Lolu akuso daba lokukhethana ngemihlobo kuphela….umuntu wokuza kasebenzi ngenhliziyo yakhe yonke ukuthuthukisa indawo,” kugcizelela uMnu. Ndlovu.
