Isikhulumi seMDC-T uMnu. Dougals Mwonzora uthi uvimbele izisebenzi zomthethwandaba ebezithunywe ukuthi zizothathela umkhokheli webandla lakhe uMnu. Morgan Tsvangirai impahla emzini wakhe weHighlands eHarare, esithi bebejonge ukuzomyangisa nje.
Kodwa izisebenzi lezi zithi zilandela isinqumo somththwandaba esokuthi zithathe lezimpahla ukubhadala izisebenzi zeMDC-T ezithi zaxotshwa umsebenzi ngokungekho emthethweni ngomnyaka ka 2010.
Kukhangelelwe ukuthi indlu kaTsvangirai kanye lemota zakhe zizathengiswa ukuze izisebenzi zeMDC-T ezaxotshwayo zithole iholo lazo lamadola afika phose ingxenye yesigidi-$491 760.
Kusenjalo, ukuthethwa kwecala eletheswa uMnu. Witness Dube otshayela imota kaNkosazana Thokozani Khuphe ongumsekeli kamkhokheli we MDC-T kwedluliselwe phambili lamuhla ngoba amagqwetha kaMnu. Dube ekhalaze ukuthi aqale efundisise amaphepha emthethwandaba aphathelane laloludaba.
UDube wetheswa icala lokutshaya umtshayeli wemota kaMnu. Sengezo Tshabangu okucele lalelibandla eleRenewal Team, kanye lokumthathela imota, imali, labomakhalekhukhwini.
Ubikwa njalo esithi wayelandela amazwi omkhokheli webandla lakhe uMnu. Morgan Tsvangirai awokuthi kufanele impahla yeMDC-T ithathelwe abanye babo abakuRenewal Team, kodwa kawavumi amanye amacala akhe.
UMnu. Tshabangu utshele uSithandekile Mhlanga weStudio 7 ukuthi ibandla lakhe lilokhu lilindele imota okwathiwa iMDC-T iyibuyisele kubandla leRenewal Team.
