Ibandla leMDC-T lithi akusiqiniso ukuthi ukuxotshwa kukaMnu. Tinashe Kambarami, owayemgumsekeli kaMayor wedolobho lakoBulawayo akusoze kusebenze ngoba wayesevele emisiwe ukusebenza lidale laphezulu leHigh Court ngesikhathi ibandla leli lithatha lelo inyathelo ngomnyaka odluleyo.
Inhlanganiso ye1892 Mthwakazi Restoration Movement Trust kanye loNkosazana Nomalanga Dabengwa bamangalela uMnu. Kambarami emthethwandaba ophezulu owe High Court besithi kafanelanga ukuphatha lesi isikhundla ngoba wake watholakala elecala, lakanye wamiswa umsebenzi.
UMnu. Kambarami, onguKhansila kaWard 3, ekubandla leMDC Alliance waphikisa isinqumo se high court emthethwandaba we supreme court, wona onqume ngeviki edluleyo ukuthi engaqhubeka ngokuphatha izikhundla zakhe.
Kuqhamuke ingxabangxoza emhlanganweni omkhulu we-full council meeting koBulawayo izolo uMnu. Kambarami ezama ukuphatheka kuwo, amapholisa kamanisipala amhudulela phandle.
UMnu. Kambarami utshele iStudio 7 ngemva kwalingxabangxoza ukuthi wathumela ikhansili isinqumo somthethwandaba esimbuyisela esikhundleni sakhe ngakho akufanelanga kube lenkinga ngaloludaba.
Kodwa isikhulumeli seMDC-T uMnu. Witness Dube uthi uMnu. Kambarami uyazikhohlisa njalo uhlelo lokuxotsha abangalandeli izinqumo zeMDC-T luyaqhubeka.
