Ibandla leMDC lithi umholi walo uMnu. Nelson Chamisa uvinjelwe ukuhlala esigabeni sabantu abalezikhundla eziphezulu, i-VIP Section, ngoLwesihlanu enkonzweni yokuvalelisa umufi uMnu. Dumiso Dabengwa enkundleni yeWhite City Stadium koBulawayo.
UMnu. Dabengwa, owayekhokhela ibandla leZAPU njalo owalwa kumpi yenkululeko ekuviyo leZIPRA, utshone ngeviki edluleyo eseleminyaka engamatshumi ayisikhombisa lasitshiyagalolunye 79. Umndeni wakhe uthi uzabekwa ngoMgqibelo eNtabazinduna.
Umgcinisihlalo weMDC uNkosazana Thabitha Khumalo, obekhaphe uMnu. Chamisa, uthi obelinde isigaba seVIP uthe akufanelanga kuhlale amalunga ezombusazwe kuleyondawo.
Uthi uzame ukubuzisisa ngalokhu kodwa katholanga impendulo ecacileyo, okubadanisileyo ngoba uMnu. Chamisa ekhokhela ibandla elaziwayo, elilamalunga edale lephalamende.
UNkosazana Khumalo uthi lanxa umsekeli kamayor wedolobho lakoBulawayo uMnu. Tinashe Kambarami, obevele esehleli kulindawo, esukumile ezama ukunika uMnu. Chamisa isihlalo sakhe, wenqatshelwe ukwenza lokhu.
Usole njalo ukuthi inkosi yamaNdebele uMnu. Bulelani Khumalo, kabikwanga kulumkhosi.
Kodwa uthi ngaphandle kwalokho, umkhosi lo uqhubeke kuhle njalo inengi labantu ligcizelele ukuthi kufanele kulungiswe ngokupheleleyo udaba lweGukurahundi, okuyikho okwakukhankaselwa nguMnu. Dabengwa.
UMnu. Dabengwa waphumela egcekeni ukuthi usekela uMnu. Chamisa kukhetho olwedluleyo, lapho aphatheka emhlanganweni weMDC koBulawayo.
