amalinks wokungena

Breaking News

Kungani Amapholisa Evumela iZanu PF Ukutshengisela NgoLwesine Kodwa iMDC Isalelwa?


Zanu PF Spporters
Zanu PF Spporters

Kulabanye abasola uhulumende ngokuvumela abebandla le ZANU PF ukuthi batshengisele bekhonona ngezijeziso zenotho ezafakelwa enye inkokheli yalelo bandla, ngamazwe angentshonalanga kodwa ibandla leMDC lona lisalelwa ukutshengisela.

AbeZanu PF bathi bazatshengisela ngoLwesine besekela inyathelo elithethwe ngabenhlanganiso yeSADC eyokusekela iZimbabwe emkhankasweni wokukhutshwa kwezijeziso zenotho ezafakwa ngamazwe angentshonalanga.

Lokhu sekudale ukuthi uzulu asole uhulumende ngoba eyalise abe MDC ukuthi batshengisele kumaviki amabili edluleyo.

Ingcwethi kwezombusazwe uMnu. Thabani Maligwa uthi lokhu kuveza ukuthi uhulumende kamongameli Emmerson Mnangagwa usebenzisa umthetho ngendlela elobandlululo.

“Ukuthi sibone iZanu pf ilungiselela ukuthi nbayetshengisela, betshengisela phezulu kwezijeziso zenotho kuyinto edanisayo kakhulu nxa sikhangele ukuthi emavikini adluleyo, kunyanga ephelileyo ibandla eliphikisayo labantu nje izizalwane zeZimbabwe baliswe ukuthi batshengisele bekhangelane lobunzima esikhangelane labo elizweni, lokhu kuyasitshengisa ukuthi uhulumende weZanu pf ulobandlululo njalo usebenzisa umthetho ukubana lapho okuvuma kibo kube yibo bodwa abakholisa amalungelo abanye bencindezelwa,” kutsho uMaligwa.

UMaligwa uqhubeke ethi kulokuthi abeZanu pf batshengisele kumele bacebise inkhokheli yabo ukuthi ilondoloze amalungelo oluntu okuyikho okwaletha izizeziso lezo.

“Lokhu akungeke kube liqiniso ngoba singakhangela izijeziso zenotho zafakwa ngamazwe afana leMelika le EU,nxa betshengisela beseHarare akungeke kwenze umehluko aluba kumbe batshengisela beseNew York njalo futhi nxa sikhangele ukuthi ukuze izijeziso zenotho zikhutshwa kukhona okwafakwayo okufuna bekwenze okuyithi aluba bayenza amapolitical reforms wonalawo abawatshelwayo kubalesisindo kulokuthin betshone bebhoda ezitaladeni kulokuthi belungisise inhlupho eziseZimbabwe,” kutsho uMaligwa.

UMnu. Kholwani Donga osakhulayo oweHarare uthe akaboni sizatho sokutshiya umsebenzi wakhe wokuthengisa emkambo esiyatshengisela phezu kwezijeziso zenotho zona athi akuyisizo eziletha inhlupho ezibhekane leZimbabwe.

“Thina asisoze sitshiye imisebenzi yethu sihgambe sisiyatshengisela, akwenzi ngenxa yokuthi siyakwazi ukuthi uMnangagwa uvala abantu amehlo siyekwazi ukuthi inkinga zelizwe lethu akusiwo ma sanctions. Siyakwazi ukuthi abantu abakuma sanctions list belutshwana vele abadluli abahlanu, so leyo yindlela yokuthi nje athole isizatho sokuvala ukuthi useyehlulekile ukukhokhela, useyehlulekile ukufaka inhlelo ezingasincedisa ukuthi siphumelele, angiboni kulento engaphuma la,” kutsho uDonga.

Kunjalo nje, uMayor wedolobho leChitungwiza umnumzana Lovermore Maipa owebandla le MDC namhlanje utshaywe ngabacatshangelwa ukuthi yintsha yeZanu PF ngemva kokuba ebhalele umabhalane omkhulu wekhansili, uTown Clerk uMnu. George Makunde incwadi yokuthi ame ukubuya emsebenzi kuhlolisiswa ukungabuyi kwakhe emihlanganweni yekhansili emele yenziwe ekhona. Intsha le ibikwa isekela uMakunde.

Kodwa ingcwethi kwezombusazwe uCharles Nyoni uthe kulusizi ukuthi amalunga ebandla eliphikisayo aqhubekela phambili ehlukunyezwa kungela nyathelo elicacayo elithathwa nguhulumende.

“Ukutshaywa kuka mayor yinto engalunganga njalo yinto edanisayo ukuthi lapha eZimbabwe into enje ilokhu isenzakala kungasenani nje ukuthi uhulumende ulokhu etatazela esithi akula kuhlukuluzwa kumbe tshaywa kwabantu kodwa lokhu sekusitshengise ukuthi uhulumende ulesandla phezulu kwezinto lezi ezenzakalayo ezibamba uzulu kulelilizwe njalo nje injongo yabo isitshengisa ukuthu uhulumende uzinikele ukuthi alandele amakhansili wonke akhokhelwa libandla le MDC kusiba lenkinga kulawo makhansila ukuze kube lokumiswa umsebenzi kwamakhansila lokusungulwa kwamakhomishini njengalokho esakubona sekufuna ukwenzakala koBulawayo. Yinto nje esiyijayeleyo eyayisenzakala uMugabe esasekhona lakathesi iloku iqhubekela phambili,” kutsho uNyoni.

Lokhu ayisikho kwakuqala ukuqhamuka ukufuthelana phakathi kukaMayor owebandla le MDC lesiphathamandla sekhansili. Lokhu kuza ngemva kwesehlakalo sako Bulawayo kunyanga ezedluleyo.

Abanye bathi iziphathamandla zikahulumende ziqhubekela phambili zinganaki amandla amakhansila ikakhulu lapho engamakhansila awebandla le MDC.

please wait

No media source currently available

0:00 0:03:04 0:00

Kodwa, unobhala obona ngenhlelo zebandla le Zanu PF, uMnu. Obert Mpofu uthi ukutshengisela okuqowqa libandla lakhe ngumhlangano hatshi ukutshengisela.

Uthi bona baphiwe imvumo yokwenza uhlelo lwabo ngoba bengela dlakela njengebandla le MDC eselingelihlala lincitshwa imvumo yokutshengisela ngamapholisa.

UMpofu utshele iStudio Seven ukuthi amalungiselelo okufola lokhu abakuqoqayo asekusibanga saphezulu.

please wait

No media source currently available

0:00 0:02:26 0:00

XS
SM
MD
LG