amalinks wokungena

Breaking News

Inhlanganiso yeZimbabwe Media Council Yethula Ugatsha Lokuhlola Ukwethulwa Kwembiko Elizweni


Inhlanganiso le, ilamalunga alitshumi lantathu njalo agoqela intathelizindaba ezisebenzela imisakazo lamaphephandaba kahulumende.

Inhlanganiso ebona ngokwethulwa kwembiko eye Zimbabwe Media Commission (ZMC) yethulele uzulu ugatsha lwayo olutsha olwe Media Council olukhangelelwe ukuhlolisisa imbiko eyabe isolisa ephuma emsakazweni lakumaphephandaba ilandela umthetho we Access to Information and Protection of Privacy Act, i AIPPA.

Inhlanganiso le, ilamalunga alitshumi lantathu njalo amalunga ayo agoqela intathelizindaba ezisebenzela imisakazo lamaphephandaba kahulumende ezigoqela oMnumzana Henry Muradzikwa, Happson Muchechetere, Justice Mutasa, Ben Madzimure labanye.

Inhlanganiso le ayilamalunga avela kuntathelizindaba zamaphephandaba azimeleyo kodwa iZMC ithi banxuswa bala njalo inengi labo liku Voluntary Media Council of Zimbabwe.
Inhlanganiso le ikhangelelwe ukubeka imithetho okuzamele ilandelwe ngabasebenza ekwethulweni kwembiko njalo ilamandla okujezisa ozayephula.

Inhlanganiso ezibona ngokwethulwa kwembiko ezigoqela i Media Monitoring Project of Zimbabwe lezinye zisole ukubunjwa kwalinhalnganiso zisithi kusobala ukuthi izakwephula amalungelo oluntu.

UMnu. Nhlanhla Ngwenya, isiphathamandla se MISA-Zimbabwe utshele uSithandekile Mhlanga weStudio 7 ukuthi kusobala ukuthi injongo yalinhlanganiso ayiqondanga.
XS
SM
MD
LG