amalinks wokungena

Breaking News

Kubotshwa Abalandeli beMDC-T Okuthiwa Batshaya Abanye Babo Ngamatshe koBulawayo


Umsekeli kaMayor wakoBulawayo uMnu. Gift Banda

Abantu abalitshumi lane abagoqela umsekeli kaMayor wakoBulawayo, uMnu. Gift Banda, uKhasila Mlandu Ncube lezinye iziphathamandla zebandla leMDC-T babotshwe ngamapholisa lamuhla besetheswa amacala okubangela udlakela emawofisini ebandla leli ngeSonto lapho okutshaywe khona abanye babo besemhlanganweni.

UNcube utshele umsakazo weVOA Studio 7 ukuthi amapholisa abethesa amacala okwephula iSigaba 36 somthetho obizwa ngokuthi yiCriminal Law Codification and Reform Act (Ikhasi 9:23).

Kuthiwa babambisana bayahlasela emawofisini ebandla leli lapho okwakulabanye babo abangazwani labo ngokusekela okumele athathe isikhundla sikamuyi uMorgan Tsvangirai.

Abahlaselwayo bacatshangelwa ukuthi ngabafuna ukuthi uNkosazana Thokozani Khupe athathe isikhundla sikaTsvangirai. UNcube labanye ababotshiweyo kuthiwa basekela uMnu. Nelson Chamisa owahle wathatha isikundla lesi esebenzisa idale leNational Council uTsvangirai engakangcwatshwa.

UKhupe uthi nguye okumele abambe isikhundla sikaTsvangirai kuze kwenziwe ukhetho lonyaka. Omunye wabasekeli bakamongameli, uMnu. Elias Mudzuri, usethule wathi sece kuChamisa ekhangelele ukuthi uzakuba ngumsekeli kamongameli welizwe nxa uChamisa engakhethwa ukuba ngumongameli omutsha kukhetho oluzayo.

UNcube uthi abantu ababangela udlakela lolu bagoqela uMnu. Abednico Bhebhe, unobhala obona ngenhlelo ezitshiyeneyo kubandla leMDC-T. Kodwa uBhebhe uthi uNcube labanye bakhe yibo abenza kwaba lodlakela emawofisini eMDC-T.

Facebook Forum

XS
SM
MD
LG