Amalunga edale lephalamende ayekukhomithi ebona ngokwenjiwa kwemigodi, wona etheswa icala lokuzama ukwamukela imali efika inkulungwane ezingamakhulu amane amadola-$400 000 dollars ngokungekho emthethweni kusomabhizimusi uMnu. James Goddard, athi uMnu. Shepherd Tundiya, owaqoqa ukuthi behlangane losomabhizimusi uMnu. James Goddard uvele uliqili okungafanelanga lithenjwe.
Amalunga la abalisa uMnu. Themba Mliswa, owayengumgcinisihlalo walikhomithi, uMnu. Leonard Chikomba webandla leZANU PF omela iGokwe Kabuyini, uMnu. Anele Ndebele weMagwegwe loMnu. Prince Dubeko Sibanda we Binga North, bobabili bengabebandla leMDC. Bebekhuluma phambi kwedale elidingisisa ngaloludaba.
UMnu. Goddard, owayefuna ukutshala imali kunkampani yeHwange Colliery, uthi usomabhiziumusi uMnu. Tundiya nguye owayefuna ukuphiwa limali njalo uMnu, Chikomba weZANU PF nguye owamnika imniningwane yakhe yebhanga lapho ayengayifaka khona, kukanti uMnu. Mliswa loMnu. Ndebele basebengekho kukhulunywa ngaloludaba. UMnu. Chikomba uvumile ukuthi wakwenza lokho, kodwa ekholwa ukuthi uMnu. Tundiya ufuna ukumbhadala isikwelede sakhe ehlawulwa nguMnu. Goddard.
