Ugatsha lukahulumende olubona ngokwethulwa kwembiko luthi umongameli Emmerson Mnangagwa uthi ukubona abantu beqhuba ingxoxo-mpikiswano, i debate, ngodaba lweGukurahundi besebenzisa amaphephandaba, imsakazo, omabonakude, kanye lezinye inkudla zokuxoxisana.
Umongameli Mnangagwa ukhulume la amazwi kungxoxo lentathelizindaba, yona ebigxile kumkhosi wokunanza ilanga lapho eleZimbabwe elathola khona uzibuse-i Independence Day mhlaka 18 kuyonale inyanga kaMabasa.
Kodwa inengi elethule imbono yalo ngalumbiko, wona ubusenkundleni yeTwitter, basolile besithi kufanele uhulumende aveze ugwalo lweChimbahakwe Report oluchaza konke okwenzakala ngalesi isikhathi. Abanye njalo bathi ukuxoxa akusizi, ngoba kufanele abaphatheka kulesi isehlakalo bevume okwenzakalayo, baxolise, njalo kuhlawulwe abathinteka kulesi isehlakalo.
Kubikwa kwabulawa abantu abedlula inkulungwane ezingamatshumi amabili ezigabeni zeMatabeleland leMidlands libutho leFifth Brigade ilizwe lisanda ukuthola uzibuse. Umongameli Mnangagwa lezinye inkokheli zikahulumende zibikwa zaphatheka kulesi isehlakalo ngendlela ezitshiyeneyo.