amalinks wokungena

Breaking News

Abasekeli bebandla leMovement for Democratic Change (MDC-T) lezinye izizalwane zeZimbabwe ezikwele South Africa abehluleke ukuya emngcwabeni kamuyi uMorgan Tsvangirai sebethule amazwi enduduzo lenkuthazo kumuli kamuyi lasebantwini bonke abebesemngcwabeni lamhlanje.

Bathi lobanje bekwele South Africa ngomzimba, inhliziyo zabo bezisemngcwabeni eBuhera.

Izinkulungwane zabasekeli beMDC-T labantu abangasekeli ibandla leli abasebenza kwele South Africa behlulekile ukuya emngcwabeni kaTsvangirai ngoLwesibili emzini wakhe eBuhera. Abanye bathi babanjwe yimali kanti abanye babanjwe ngumsebenzi kodwa bonke bathi inhliziyo zabo bezisemngcwabeni ilanga lonke.

Isizalwane seZimbabwe eJohannesburg, uMnu. Lebani Nkomazana, uthi kuyamangalisa ukuthi yindaba uTsvangirai engangcwatshwanga emathuneni amaqhawe esizwe eHeroes Acre.

“UMorgan Tsvangirai ubelwela amalungelo oluntu kusukisela ngesikhathi engumkhokheli weTrade Union eZimbabwe. Wasuka lapho wayabumba iqembu lakhe le MDC, lona elilwele i economic freedom, lalwela ama electoral reforms, lalwela i freedom of speech kanye le democracy elizweni lonke jikelele. Liqhawe.”

“Ngakwelinye icele uMnu. Washy Mabizela, ohlala eCape Town, yena ubonga bonke ababesemngcwabeni ngokuyamela bonke abangenelisanga ukuyafihla umuyi.

“Mina ngithi kuMorgan Tsvangirai hamba kahle. Lala ngoxolo mnumnzana. You fought a good war. Okwakho uzamile. Ngithi kubantu beZimbabwe bonke asimeni, asilweni size sithole lento eyayilwiswa nguMorgan Tsvangirai. Lala kahle.”

Omunye njalo weZimbabwe, unkosikazi Ritta Hove, uthi umuyi yiyo indoda yakuqala eZimbabwe ukuqoqa uzulu ukuthi amelane lombuso kamnumnzana Robert Mugabe ngokweqiniso langokuzimisela.

“Ngithanda ukuthi siyabonga baba. Uyenzile eyakho indima. Sohlala sikukhumbula qhawe lethu, Sabe. Njalo kufamily yakhe ngithi duduzekani bakoTsvangirai. Ukufa yindlela yethu sonke. Rest in peace our hero.”

UMnu. Khulekani Dube uthi bekungcwatshwa iqhawe lamaqhawe. “Ngithi makalale ngokuthula. Uyibekile induku ebandla. UTsvangirai ngimthatha njengeqhawe obekufanele ukuthi ngabe laye ungcwatshwe lapho obekungcwatshwa khona amanye amaqhawe.

“Kumaqembu aphikisayo ngobunengi bawo nguye umuntu okwaze ukunyakazisa uMugabe. Siyawadinga amaqhawe afana laye sengathi nabaseleyo nabo bangaba nalo uzwelo babenenhliziyo kaTsvangirai, babuse ilizwe ngokucabangela abantu hatshi ukuzicabangela kuphela.”

Ilunga leMDCT ongomunye wabakhokhela leli bandla kwele South Africa, uMnu. Bongani Mathe, obesekhaya ukuyamela abangenelisanga abasemazweni, uthi baswele imilomo eyinkulungwane yokubonga.

“Kuyasijabulisa mpela ukuthi iqhawe lethu libekwa ngendlela elesizotha. Liphelekezelwe yiZimbabwe yonke jikelele. Siyabonga kakhulu kuZimbabwe. Sibonge kakhulu nakumuli eyaseboleka iqhawe leli ukuthi sisebenze lalo.”

Njengobanje umuyi eselele othulini olubandayo inengi kwele South Africa lilombuzo wokuthi kambe ibandla leMDC-T lizaqhubeka yini lilamandla ebelilawo ngaphansi kobukhokheli buka Tsvangirai?

Facebook Forum

XS
SM
MD
LG