Kuhlelo lwethu oselethulela lona maviki wonke, Liphuma Lendaba Litshona Lendaba sixoxa loMnu. Moses Mzila Ndlovu owayengunobhala jikelele webandla leMDC elikhokhelwa nguMnu. Welshman Ncube kulandela imbiko ethi yena labanye bakhe ababekubandla leli sebecabanga ukusungula ibandla lezombusazwe.
UMzila Ndlovu ubekwele South Africa ngoLwsihlanu olwedluleyo lapho abikwa ebe lomhlangano khona lezizalwane zeZimbabwe ezihlala khonale.
Lanxa kulemibiko ethi ibandla selisunguliwe kudala uMzila Ndlovu ulandule lokhu esithi lokhu kusasengumcabango osexukwini elaxotshwa ebandleni leMDC ekhokhelwa nguNcube ebalisa uMzila labanye abafana loMnu. Esoph Mdlongwa.
Kodwa uMzila uthi bathe bephume ebandleni leli baba lenhlamvu ezintathu ezibalisa ukusuka kwezombusazwe, ukungena kwelinye njalo ibandla lokusungula ibandla elitsha.
"Kahle ngiqondise umcabango lo othi sesisungule ibandla, uhlelo lwethu lubalulekile kakhulu. Sithe sisehlukana lomlisa lo, uMnu. Welshman Ncube savumelana njengabantu abaphatheka kuloludaba ukuthi sikhethe phakathi kwento ezithize," kutsho uMzila Ndlovu.
