lkhomishini edingisisa ngokwenzakala mhlaka 1 kuNtulikazi lonyaka kudlakela olwaqhamuka ngemva kokhetho, isigcizelele ukuthi iphakathi kokulolonga ugwalo olumumethe okwatholakalayo.
Ikhomishini le yayithe isigqibile loluhlelo njalo izaqhubela lolugwalo umongameli Emmerson Mnangagwa ngoMqibelo odluleyo, ngemva kokumnika isifinqo salo ngoLwesine, kodwa yaphinda yathi ayiseyikukwenza lokhu ngoba kukhona okunye okumele kulungiswe.
Lokhu kwenzakala isikhulumeli sikaMnangagwa uMnu. George Charamba esithi akulamthetho obamba ngamandla umongameli ukuthi ethulele umphakathi ugwalo lwereport.
Ikhomishini le, ekhokhelwa nguMnu Kgalema Motlanthe, ibiphiwe inyanga ezintathu ukuqhuba loluhlelo, njalo ilanga lokucina elokuphutsha lumsebenzi limhlaka 19 kuyonale inyanga
Kwaphuma ubufakazi obutshiyeneyo phambi kwale ikhomishini, ebone iziphathamandla zikahulumende kanye lezamabandla atshiyeneyo, zisethesana umlandu ngokuthi onguye owabangela udlakela njalo wabulala abantu ngubani.
Kwadutshulwa abantu abayisithupha kwalimala abambalwa kutshengiselwa kusolwa indlela impumela yokhetho eyayisethulwa ngayo yinhlanganiso yeZimbabwe Electoral Commission.
Isikhulumeli salikhomishini uMnu. John Masuku usichasisela okunengi ngaloludaba.
