Uzulu usele emangele ukuthi abacatshangelwa ukuthi bathengisa imali emkambo wensitha leyinye inkohlakalo baze bavezwa ngosakhulayo othiwa nguMnu. Acie Lumumba obephiwe umsebenzi waxotshwa ngemva kwamalanga amathathu.
ULumumba uveze amagama eziphathamandla ezine zebhanga le Reserve ezivuke zamiswa umsebenzi zihlolisiswa ezikwenzayo.
Kambe engabe exotshelweni uLumumba?
Ukuhlaziya loludaba sixoxe lowalwa impi yenkululeko, uMnu. Max Mkandla endawonye lesiphathamandla sebendla le MDC, uMnu. Edwini Dube onguye osungula lingxoxo.
UNdlovu uthi abantu abenza inkohlakalo yibo kade bevele bebenza.
"Ukuthi ukhitshwe esikhundleni ngoba ulobugwelegwele according to Zanu PF kuyabe sokuyikuthi selisilwa lina lodwa ngaphakathi beseliveza emphakathini," kutsho uNdlovu.
Kodwa uthi inkohlakalo ayisiyo entsha njalo bebekhangelele ukuthi njengoba kungene uMnu. Mthuli Ncube ukuthi abe ngumphathintambo wezemali bebesithi okwakuqala uzabandulula ibhanga le Reserve abesexotsha usibalukhulu walelibhanga, uMnu. John Mangudya adinge abatsha azasebenza labo.
UMkandla uthi njengesiphala esigcina imali uNcube waphangisa wathembisa abantu okunengi yena engafundanga ukusebenza kwe Zanu PF.
"Kuyafanana lokuthi afake labosibalukhulu abatsha acubungule ukuthi kanti vele kwakuhamba njani kulelibhanga," kutsho uMkandla.
Uthi ukukhutshwa kukaMnu. Acie Lumumba ukuba yisikhulumeli sogatsha lukamphathintambo wezemali akusoze kummise ngoba uzabaveza kuphela.
