Umphathintambo obona ngezemali uMnu. Mthuli Ncube uthi uhulumende uzaqhubeka ebhadalisa abantu umthelo wemali eyisilinganiso sokubili ekhulwini; i-two percent, ngoba wasungulwa ngokusemthethweni kulandelwa umthetho we Finance Act ka 2019.
UMnu. Ncube wethule lumbiko ngoLwesithathu ntambama kulandela isinqumo esethulwe ngumthethwandaba wehigh court esokuthi umthelo lo kawusungulwanga ngokusemthethweni.
UMnu. Ncube usungule lumthelo ngenyanga kaMfufu ngomnyaka odluleyo ngemva kokugambela umthetho we Income Tax Act owomnyaka ka 2010.
Udaba lolu lwakhwezwa emthethwandaba nguMnu. Mfundo Mlilo, olwela amalungelo oluntu, njalo umelwe nguMnu. Tendai Biti, oyisiphathamandla sebandla leMDC.
UMnu. Ncube engakethuli umbiko wakhe, uMnu. Biti ubikwa ethe uyakwazi ukuti uhulumende uzaphikisa loludaba esebenzisa umthetho weFinance Act, kodwa lanxa engenza njalo, bazimisele ukulwisana lalumthelo.
Ukuze sizwe okunengi ngaloludaba, sixoxe legqwetha uMnu. Kucaca Phulu, okubandla leMDC, njalo emela iNkulumane edale lephalamende, lapho udaba lolu olwake lwahluzwa khona.
