Umphathithambo obona ngezemali uMnu. Mthuli Ncube uthi ukusetshenziswa kwemali yakwamanye amazwe yikho okubangele ukubhidlika komnotho welizwe kuminyaka edluleyo njalo ukumiswa kwaloluhlelo kuzadala umahluko.
UMnu. Ncube, obekhuluma emhlanganweni oqoqwe yintathelizindaba eHarare ngoMvulo, wengeze wathi uhulumende uzakhuphula iholo lezisebenzi zakhe njalo uzaxoxisana lazo ngaloludaba kusasa. Ukhuthaze amabhizimusi ukuthi lawo enzenjalo ngoba kusobala ukuthi ayathola inzuzo.
Ekhuluma emhlanganweni ofanayo, usibalukhulu webhanga lelizwe eleReserve Bank of Zimbabwe, uMnu. John Mangudya uthe okubuyisela ilizwe emuva yikuthi abantu abazithembi inhlelo zikahulumende njalo ilizwe alizihiqizeli impahla zalo, okuyikho okuzalungiswa.
Ukuhlaziya loludaba, sixoxe loMnu. Benard Bhekilizwe Ndlovu, yena othi uvumelana lokumiswa kokusetshenziswa kwemali yakwamanye amazwe ngendlela yokuthuthukisa umnotho welizwe.