Ibandla lezombusazwe eliphikisayo eleMthwakazi Republic Party lithi selixazulule udaba obeluhlupha esikolo semfundo ephezulu koBulawayo, i Entumbane High School lapho abanye abantwana abavinjelwe ukubhadalela umhloliso we Ordinary Level walonyaka ngoba belokhu belezinye izikwelede abangakazihlawuli.
Ibandla leMthwakazi Republic Party lethule umbiko lisithi selivumelane lomphathisikolo kanye lomsekeli wakhe ukuthi abazali bebhadale ukwenzela ukuthi bengavalelwa phandle, kuthi izikwelede zibhadalwe ngemuva, njengoba abantu bengelamali eneleyo ngenxa yomnotho welizwe ongamanga kuhle.
Ibandla leli lithi litshayelwe ucingo ngabazali bekhalaza ukuthi bebaphathise njalo licabangela ukuthi kulezisebenzi zakulesi isikolo ezingasizo zeMatabeleland, ezilobandlululo.
Abazali babikwa sebebhadalela abantwababo imali yomhloliso we’O’ Level kungelankinga. IStudio 7 ayenelisanga ukukhuluma lomphathisikolo wesikolo seEntumbane ngaloludaba.
Kusenjalo, umkhokheli webandla leMthwakazi Republic Party uMnu. Mqondisi Moyo uthi ibandla lakhe liphakathi kokulungiselela ukhetho ngokuqhuba imihlangano yama rallies endaweni ezitshiyeneyo zelizwe.
UMnu. Moyo uchasise okunengi ngenjongo yebandla lakhe langendlela elamukelwa ngayo ezabelweni.
Siphinde saxoxa loMnu. Joseph Tshuma, isiphathamandla sebandla leZANU PF, yena othi susobala ukuthi bayanqoba kukhetho oluzayo.