amalinks wokungena

Breaking News

UMongameli Mugabe Ucubungula Umkhuhlane WeEbola KweleMelika


UMongameli Robert Mugabe weZimbabwe

Umongameli Mugabe, yena okhatshwe nguyinkosikazi yakhe uGrace, lezinye iziphathamandla zikahulumende, ubikwa enxuswe kulumbuthano ngoba engumgcinisihlalo weAfrican Uniono.

UMongameli Robert Mugabe, okhonapha eMelika eNew York, emhlanganweni wokulwisana lomkhuhlane weEbola, oweUnited Nations International Ebola Recovery Conference, ukhangelelwe ukukhuluma kulumbuthano ngoLwesihlanu lapho ozabe uvulwa khona ngokusemthethweni.

Kukhangelelwe ukuthi inkokheli zamazwe ahlaselwa kakhulu ngumkhuhlane weEbola, ezigoqela uMongameli weGuinea uMnu. Alpha Conde, owe Sierra Leone, uMnu. Ernest Karoma, kanye loweLiberia uNkosikazi Ellen Johnson Sirleaf zizachasisa ngokwenzakala emazweni azo kulumhlangano.

Umongameli Mugabe, yena okhatshwe ngumkakhe uGrace ubikwa enxuswe kulumbuthano ngoba engumgcinisihlalo womanyano wamazwe akuzwekazi leAfrica owe African Union. Abanye abamkhaphileyo yiziphathamandla zikahulumende ezigoqela umphathintambo obona ngezempilakahle uMnu. David Parirenyatwa, okhangelane lobudlelwano lamanye amazwe uMnu. Simbarashe Mumbengegwi, kanye lobona ngenhlelo zemali uMnu.Patrick Chinamasa.

Lokhu kwenzakala lanxa inengi eZimbabwe, eligoqela ibandla leMDC, lisola uMongameli Mugabe lisithi uyahamba-hamba mahlayana kwamanye amazwe kulokuthi ahlale ekhaya elungise umnotho welizwe, wona oqhubeka ubhidlika.

Kusenjalo, umsakazo we ZBC uthi umsekeli kamongameli uMnu. Emmerson Mnangagwa, yena owethekelele kwele China, ekhatshwe ngumphathintambo kahulumende obona ngezamabhizimusi, uMnu. Mike Bimha, usehlangane leziphathamandla zamankampani alelolizwe edlula amatshumi amabili lanhlanu, wazikhuthaza ukuthi zizovula amabhizimusi elizweni ngoba eleZimbabwe lisebenzelana kuhle lamanye amazwe.

EleZimbabwe libikwa selisayine isivumelwano sokusebenzelana lomanisipala we Qingdao eChina.

XS
SM
MD
LG