Umqeqetshi weqembu lamankazana aleminyaka engaphansi kwamatshumi amabili elimela ilizwe le Zimbabwe emdlalweni wenguqu uRosemary Mugadza, uthi iqembu lakhe lingafika khatshana kumncintiswano owokudinga amaqembu azakuyadlala emidlalweni yezizwe zomhlaba nxa lingalungiselela ngemfanelo.
Iqembu leli eliqeqetshwa ngu Rosemary Mugadza lidlulele phambili ngemva kokunqoba ele Malawi nge 2 ka 1nxa kuhlanganiswa impumela yemidlalo emibili edlalwe yilawa maqembu kusigaba se preliminary round.
Umdlalo wakuqala odlalelwe kwele Malawi uphele amaqembu lawa engutshiki lobhanqa 1 ka 1 kwathi ngoMgqibelo owedluleyo iqembu le Zimbabwe linqobe nge 1 ka nya.
Loba linqobile iqembu le Zimbabwe kalidlalanga ngendlela ethokozise abalandeli balo kodwa uMugadza utshele intathelizindaba zemidlalo ukuba iqembu leli lilabadlali abalesipho esokudlala umdlalo wenguqu abangenza izimanga nxa bengathola isikhathi eseneleyo esokuzilolonga.
“Njengoba senelise ukuchapha kusigaba se preliminary sekumele inhlanganiso isiphe isikhathi esaneleyo esokuzilolonga sindawonye lamankazana.
Silethemba elokuthi sizabe sithola amaviki phose amabili ukuba sihlangane silungisise lapho okuxega khona kungxa zonke zenkundla,” kutsho uMugadza.
Iqembu le Zimbabwe lizadibana lele Ethiopia ngenyanga kaMbimbitho kusigaba sakuqala esomkhankaso wokudinga amaqembu azakuyadlala kumidlalo yezizwe zomhlaba njalo iqembu elizanqoba lapho lizadibana lelizanqoba phakathi kwele Botswana lele South Africa ngenyanga ka Nkwenkwezi kusigaba sesibili.
Sikhangele umdlalo kakhilikithi........................
Iqembu le Matabeleland Tuskers ngoLwesibili lango Lwesithathu, mhlaka 4 lo5 Nhlolanga, 2020, lizadibana lele Rangers emidlalweni eyohlobo lwedlalwa iphele phakathi kosuku olulodwa.
Limidlalo izaqhutshelwa enkundleni ye Queens Sports Club njalo iza kungensuku ngaki iqembu le Tuskers linqobe ele Mid West Rhinos nge 32 runs emdlalweni owohlobo lwedlalwa phakathi kwensuku ezine.
Isiphathamandla se Bulawayo Metropolitan uNicholas Singo ukhuthaze abalandeli bomdlalo kakhilikithi ukuba babuye ngobunengi bezosekela iqembu le Tuskers.
“NgoLwesibili langoLwesithathu sizabe sidlala le Rangers ama One Dayer yikho abafana bazabe bekhona njalo abantu siyabanxusa ukuba bazobasekela,” kutsho uSingo.
Nyakenye iqembu le Tuskers linqotshwe ku final eyomncintiswano we One Day linqotshwa ngele Eagles ikanti yilo eliphakamise isicoco se T20.
