Ukaputeni weqembu labesilisa elimela ilizwe emdlalweni wenguqu uKnowledge Musona uthi iqembu leli khona lizatshaya eziwayo loba nje lingaqalanga kuhle umkhankaso walo owokuyadlala kumidlalo yoomncintiswano wenkezo yentshantshu yezizwe zomhlaba, eyeWorld Cup
UMusona uthi abalandeli bomdlalo wenguqu kumele babekezele ngoba emdlalweni kutholakala impumela ezintathu njalo isimo kasikho sibi kangako ngoba bengadlalanga kuhle emdlalweni owodwa.
“Indlela esiqale ngayo iyafana lesakwenza size sidlale leqembu le Botswana ngesikhathi esadlulayo. Saba ngutshiki lobhanqa kodwa ngemva kwalokho senelise ukunqoba kweminye imidlalo saphumelela ukuya kuAfcon.
Sisaselaso isikhathi sokulungisisa sinqobe. Angikhangeli ukuthi amanye amaqembu enzani ngoba kusemandleni ethu ukuthi sifinyelele ukuyadlala kumidlalo yezizwe zomhlaba,” kutsho uMusona.
Iqembu le Zimbabwe lise Ethiopia lapho elikhangelelwe ukudibana khona lelimela lelolizwe kusasa ngoLwesibili.
Elase Ethiopia lona linqotshwe nge 1 k a nya ngelase Ghana emdlalweni walo wakuqala.
Iqembu le Zimbabwe kalenelisanga ukuthola abadlali balo abadlala bekwele United Kingdom bona abavinjwe ngamaqembu abo ukuba babuye.
Iqembu le Zimbabwe likusibaya sika Group G ndawonye le Ethiopia, Ghana kanye le South Africa njalo iqembu elizaphutsha imidlalo yezibaya liphezu kwengalane yilo elizadlulalela phambili likhankasela ukuyadlala kumncintiswano wezizwe zomhlaba.
Kolunye udaba olumayelana lomdlalo wenguqu, amaqembu adlala kusigaba saphezulu aseqalile amalungiselelo awokuba aphindele enkundleni ngemva kokuphiwa imvumo nguhulumende.
Isikhulumeli seqembu le Highlanders uRonald Moyo uthi nxa konke kungahamba kuhle iqembu leli lingaqala ukuzilolonga iviki ingakapheli.
“Ngamafitshane sizaqala ukuzilolonga kuyonale iviki. Asingeke sitsho ilanga ngoba uzananzelela ukuba kulokuhlolwa okumele kwenzakale. Kulokunye okungenzakala okungaphezu kwamandla ethu kodwa singabantu abahlezi bekhangelele okuhle yikho silethemba ukuba wonke umuntu uzatholakala engela gciwane,” kutsho uMoyo.
Inhlanganiso ye Premier Soccer League ithe amaqembu aseyenze konke okudingakalayo ukuze azivikele engaqala loba namhla ukuzilolonga njalo imidlalo ye Chibuku Super Cup yona eyamiswa phakathi laphakathi ikhangelelwe ukuba iqale njalo ekupheleni kwayonale inyanga.
Labezigaba ze Northern Region kanye labe Central Region labo balobele amaqembu adlala ngaphansi kokuqondisa kwabo ukuba alungele ukuqala kwemidlalo khona okwamiswa nyakenye.