Uhulumende uthi intathelizindaba uHopewell Chin’ono kanye loMnu. Jacob Ngarivume okhokhela ibandla leTranform Zimbabwe ababotshelwanga ukuthi baveza inkohlakalo yeziphathamandla zikahulumende, kodwa ukuthi babekhuthaza abantu ukuthi betshengisele ngodlakela, besuse uhulumende embusweni besebenza lamanye amazwe afana leleMelika.
Lokhu kuvezwe ngumphathintambo kahulumende obona ngezokwethulwa kwemibiko uNkosikazi Monica Mutsvangwa ekhuluma lentathelizindaba ngoMqibelo eHarare.
UNkosikazi Mutsvangwa uthe kayisibo bodwa laba ababili abakhuluma ngenkohlakalo, bakhona abanye abazimeleyo abakwenzayo lokhu kodwa kababotshwanga ngoba kungelasizatho salokho.
UMnu. Ngarivume loChin’ono babotshwe ekuqaliseni kwayonale iviki njalo belokhu besesitokisini bezama ukukhutshwa ngokuhlawula imali yesibambiso eye bail, asebekwalelwe ngumthethwandaba. Bakhangelelwe ukuphindela emthethwandaba ekuqaliseni kwenyanga ezayo.
UNkosikazi Mutsvangwa uphinde wachasisa ukuthi uChinono kathunjwanga njengalokho okutshiwo ngabanye, kodwa wabotshwa ngokusemthethweni.
Uthi eleZimbabwe alisoze livumele udlakela ekhaya ngoba lisithi lifuna ukuba lobudlelwano obuhle lamanye amazwe ngokukhanya lingabophi abangabangela udlame.
Wengeze wathi umongameli Emmerson Mnangagwa uzimisele ukuqeda inkohlakalo elizweni njalo zikhona inhlelo zikahulumende ezikhombo lokho.
Kusenjalo, intathelizindaba uBlessed Mhlanga uthi ubotshwe okwesikhatshana ngamapholisa esiya emhlanganweni kaNkosikazi Mutsvangwa kodwa uthi ukhululwe sokungenele isikhulumeli samapholisa UMnu. Paul Nyathi kuloludaba.
Inhlanganiso elwela amalungelo entathelizindaba eyeMISA Zimbabwe ithi ibisithumele amagqwetha ukuthi ayebaphathisa kuloludaba.
Ukuze sihlaziye loludaba, lamazwi kaNkosikazi Mutsvangwa sixoxa loLeopold Munhende, isikhulumeli senhlanganiso elwela amalungelo entathelizindaba eye Young Journalists Association.
