Umkhokheli webandla leMovement for Democratic Change (MDC), uMnu. Nelson Chamisa, uthi abalandeli bebandla leli bazatshengisela emigwaqweni uMongameli Emmerson Mnangagwa aze avume ukukhulumisana laye kulungiswe okuhluphayo elizweni.
UChamisa wethule lokhu eMbare edolobheni leHarare ngesikhathi esethula umlayezelo wakhe oqakathekileyo walonyaka oweAgenda 2020 omayelana lokuzakwenziwa libandla lakhe.
Uthi uzimisele ukhulumisana loMnangagwa ngokuhlaphayo eZimbabwe okulabantu abanengi okumangalisayo ababhekane lendlala, ukuzwelakala kwemali, ukuswelakala kwemisebenzi, ubudlwangudlwangu obumemethekiswa ikakhulu nguhulumende lokunye.
Uthe angeke angene kumanyano wamabandla atshiyeneyo owePolitical Leaders Actors’ Dialogue (POLAD) owabunjwa nguMnangagwa ngoba ngowabantu abakhuluma okufanayo.
Isakhamuzi seHarare, uNkosikazi Ntombizodwa Hadebe, uthi kuqakathekile okukhulunywa nguChamisa ngoba uhulumende kaMnangagwa weba ukhetho nyakomunye.
Ibandla leZanu PF lithi uChamisa kumele akhohlwe ngezokhetho akhuthaze ukuthuthukisa ilizwe leZimbabwe.
