Umkhokheli womanyano weMDC Alliance, uMnu. Nelson Chamisa, uthi uzahlangana lequla labahlonitshwa elithiwa ngama Elders ngoMvulo ngemva kokubacebisa ngokukhathazeka kwakhe ngodaba lwamaphepha okuvotela, ama ballots, athi angacina ebangela ukuthi kungabi lokhetho ekupheleni kwayonale inyanga.
UChamisa, obekhatshwe ngumkhokheli webandla leZapu, uMnu. Dumiso Dabengwa, loMnu. Welshman Ncube, umkhokheli webandla le MDC, utshele abantu emhlanganweni wokukhankasela ukhetho olubuyayo eWhite City Stadium koBulawayo ukuthi kungela kuqilibezela usenqobile kukhetho oluzenziwa mhlaka 30 Ntulikazi.
USibangilizwe, indodana kamuyu uDokotele Joshua Nkomo, obekumbuthano lo unxuse abantu ukuthi bavotele uChamisa esithi sesifikile isikhathi sokuthi abantu bakhululeke ngemfanelo kwele Zimbabwe.
UChamisa uncome uMnu. Dabengwa njengomuntu owalwela impi yenkululeko wangazaphazanyiswa yibuhuqulizi koswa wala ehlonipha injongo yokuya empini.
Phambilini, uDabengwa utshele lumhlangano ukuthi ibandla lakhe liyamsekela uChamisa njalo wake wazama ukunxusa amanye amabandla okugoqela uNkosazana Thokozani Khuphe ukuthi lawo emsekele, kodwa kwehlula.
UMnu. Ncube yena uthe abantu bengayengwa libandla leZanu PF elithe kumele libuyiselwe embusweni ngoba liletha indlela entsha yokuguqula umnotho welizwe.
Ugogo olomfenekiso owasabalala kamabonakude enkundleni zokuxhumana esithi usekela uKhamisa laye ubekhona wasukunyiswa kodwa kazange akhulume lozulu wanyenyezela uChamisa imbiko yakhe.
Qede uChamisa walandisa ukuthi ugogo uthi kusukela lumfanekiso wafakwa ebulenjini usekhathazwa ngabantu abathi bazambululala ngoba esekela uKhamisa.
Kodwa uChamisa utshele ugog lo ukuthi engethuki ngoba kusiyaphela inyanga uzabe esebusa yena njalo uzamnxusa esigodlweni seState House ayelala okosuku olulodwa.
