amalinks wokungena

Breaking News

UChamisa Uthi Bathwele Nzima Abantu eZimbabwe Abaphansi Kohlelo LweCOVID-19 Lockdown


Nelson Chamisa

Umkhokheli webandla leMDC Alliance, uMnu. Nelson Chamisa, uthi kungcono uhulumende weZimbabwe aqhube inhlelo ezifitshane ezokuvalela abantu ezindlini hatshi ezithatha isikhathi eside njengoba abantu bephila ngokuthengisa impahla etshiyeneyo emigwaqweni.

Esethula umbiko wakhe ngokukhangelane lokumemetheka komkhuhlane weCOVID-19 ngoLwesine eHarare, uChamisa uthe ayiphelelanga indlela okulandelwa ngayo eyokuvimba iCoronavirus.

Uthe abantu abanengi kabasebenzi osokusenza ukuba bahlupheke kakhulu ngenxa yokuswelakala kwemali.

UChamisa uthe abantu abaphila ngokuthenga bethengisa impahla emigwaqweni sebethwele nzima ezindlini.

Ngakho-ke uthe bekumele uhulumende alungise indlela ezitshiyeneyo ezokunceda uzulu ngesikhathi abantu bephansi kohlelo lweCOVID-19 lockdown.

“Kumizamo yethu yokufuna ukuqeda udubo lomkhuhlane lo kumele sikwenze lokhu sinanzelela ukuba kasibulali umnotho wethu. Lindlela yokuhlala emakhaya yeLockdown kayisiyo ndlela kuphela engasetshenziswa ukuqeda lumkhuhlane, kumele kudingwe ezinye indlela ezingasetshenziswa ezisebenzelana lesimo esiselizweni lethu.”

Ugcizelele esithi iCOVID-19 kayikhethi muntu njengoba isanda kubulala ezinye iziphathamandla zikahulumende.

“Uhulumende lo kawukukhangeli ukuba sihamba lobani, sisebenzisana lobani lapho sidinga indlela zokulwisana lawo lumkhuhlane. Ngumkhuhlane ololunya, lapho odlula khona utshiya kulusizi kuphela. Kodwa sizowunqoba kuphela lumkhuhlane njengesizwe. Kunje uhulumende uphakathi kokudinga imithi yokuwelapha lumkhuhlane.”

UDokotela Garry Shava usekele amazwe kaChamisa esithi umkhuhlane lo uyabulala.

“Okuliqiniso yikuthi umkhuhlane lowu awula kuthi ungowohlangothi lolo kumbi ungowohlangothi olunye. Sonke sisengozini yalo umkhuhlane ngokunjalo kumele sihlangane, sincedisane ukuthi siwulwise umkhuhlane lowu.”

Uhulumende uthi uphakathi kokukhulumisana labakwamanye amazwe ukuze ilizwe lithole imithi yokwelapha lumkhuhlane njalo ekhangelele ukuba lokho kuyabe sekufezekile enyangeni ezimbalwa ezilandelayo.

Kodwa umnumzana Chamisa uthe kuqakathekile ukuba eleZimbabwe kanye lamanye amazwe awezwekazi leAfrica asebenze lengcwethi zawo kwezempilakahle, kudingwe indlela zokutholisa abalolwazi imali yokuthi benze inhlolisiso ezitshiyeneyo kudingwa indlela zangekhaya zokulungisa leyo mithi hatshi ukuthembela kwamanye amazwe ukuba benze lokho sikhathi sonke.

UNelson Chamisa Uthi Umkhuhlane weCOVID-19 Kawuvinjwa Ngemfanelo
please wait

No media source currently available

0:00 0:04:22 0:00


Facebook Forum

XS
SM
MD
LG