amalinks wokungena

Breaking News

Usehlohle Kathathu Umgadli Weqembu leBosso uOzias Zibande


FILE: Usele ebambe umoya unozinti weqembu le Ngezi Platinum Stars uNelson Chadya eselitshayele emambuleni umdlali weqembu le Highlanders uSimon Munawa.

Umgadli weqembu leHighlanders, uOzias Zibande, uthi ukulandela lokhu akutshelwa ngumqeqetshi wakhe uMadinda Ndlovu yikho osekwenze walitshayela kathathu emambuleni kumidlalo emibili esidlalwe lonyaka kusigaba seCastle Premier Soccer League.

“Ngithanda ukubonga umqeqetshi wami ngokungipha ithuba lokudlala njalo bekungekho lula kodwa umqeqetshi uhlala engikhuthaza ukuba ngingangena enkundleni kumele ngizame ukungena ebhokisini ngisebenzise ikhanda lami ngoba ngisenelisa ukungqikila ibhola.”

Iqembu leHighlanders ngelinye lamaqembu amathathu agoqela ele FC Platinum lele Ngezi Platinum alemiklomelo eyisithupha ngemva kokunqoba kumidlalo emibili esidlawe lonyaka.

Iqembu leBosso linqobe ele Herentals nge 2 ka nya ngeSonto kuthi ele Ngezi Platinum linqobe ele Triangle nge 2 ka nya, ele FC Platinum lalo litshaye ele Yadah nge 2 ka nya ngoMgqibelo kuthi kweminye imidlalo edlalwe kumpelaviki edluleyo iqembu le Mutare City linqotshwe nge 2 ka 3 ngele Chapungu, ele Harare City litshaye ele Bulawayo City nge 1 ka nya, ele Black Rhinos linqobe ele ZPC Kariba nge 2 ka nya, ele Nichrut libe ngutshiki lobhanqa 0 – 0 lele Chicken Inn, ele Bulawayo Chiefs libe ngutshiki lobhanqa 2 ka 2 lele CAPS United kuthi ele Dynamos libe ngutshiki lobhanqa 3 ka 3 lele Shabanie Mine.

Kusenjalo, umdlali wokugijima uNkosiyazi Sibanda uthi ngomnyaka ozayo nguye ozanqoba kumncintiswano weMatopos 33 Miler ngemva kokuqeda esendaweni yesibili kumjaho walonyaka.

USibanda ubephatheka okwakuqala kumncintiswano wePPC Matopos 33 Miler njalo uthi yena lokhu kwenze angabi kwazi ukuba agijime njani ngoba bekulengozi eyokuba ubengahle athele isiqubu kusasekhatshana lapho okuphelela khona umjaho acine engasaphutshanga.

“Lumncintiswano bengingazake ngiphatheke kuwo so bengisesaba ukuba ngingagijima kakhulu ngingalaluka ngingasaphutshanga yikho engikwenzileyo yikuba ngihlale izithende laba abajwayele ukuphatheka kulumncintiswano ukuze bengangitshiyi. Ngomnyaka ozayo ngikhangelele ukunqoba njengoba sengiyazi lami indlela okugijinyelwa khona.”

USibanda uphutshe umncintiswano walonyaka esendaweni yesibili ngemva kuka Andrew Chimbidzikai oweqembu leBlack Rhinos Athletics Club kuthi kucele labesifazane kunqobe uChiedza Chokore.

Facebook Forum

XS
SM
MD
LG