Ugatsha lukahulumende olwe Health Services Board solumeme bonke abongi labongikazi abathatha umhlala phansi labakukhefu ukuthi babuyele emsebenzini, kulandela ukukhalala umsebenzi kwabanye babo, abafuna uhulumende abakhwezele iholo njalo alungise okunengi okuhluphayo ezibhedlela.
Ngakwelinye icele, inhlanganiso elwela amalungelo abongi eye Zimbabwe Nurses Association ithi izakwelapha abantu kusasa eAfrica Unity Square eHarare kanye leCity Hall koBulawayo kusasa emini ngendlela yokusiza izigulane.
Embikweni ewethule ngoLwesine, inhlanganiso le ixwayise abantu ukuthi beze emakilinika la begqoke impahla ezilombala omhlophe ngendlela yokubaxhasa ekutshengiseleni kwabo ukwenzela ukuthi uhulumende alalele izikhalazo zabo.
Umumo ubikwa umubi ezibhedlela njalo uhulumende uthi usebaxotshile bonke abakhalale umsebenzi.
Kodwa ingcwethi kwezemithetho yamalungelo ezisebenzi uMnu. Davies Ndumiso Sibanda utshele uSithandekile Mhlanga weStudio 7 ukuthi akukho emthethweni ukuthi izisebenzi zixotshwe lugatsha olungasomqhatshi wazo.
