Umongameli Barack Obama weMelika usekhuthaze inkokheli zamazwe omhlaba ukuthi zincedisane ekulwisaneni okuhluphayo okugoqela, abalweli bokholo lwesiMoslem abedlulisa amalawulo abese Syria lamanye amazwe, umkhuhlane we Ebola ohlasele eleAfrica, kanye lokunye okunengi-nengi.
Ekhuluma emhlanganweni oqoqwe ngumanyano weUnited Nations lamuhla ntambama, umongameli Obama uphinde wathi amazwe athuthukileyo agoqela eleUnited States ayakhokhela emizameni yokulondoloza ezemvelo ngoba ekwazi ukuthi yiwo njalo akhokhelayo kunhlelo ezengezelela intuthu engalungelanga umkhathi eye greenhouse emmissions.
Wengezelele wathi kufanele amazwe athuthukayo lawo ethuthukise inhlelo zokulwisana laloludubo.
Umhlangano wokulondolozwa kwezemvelo ugqitshwe izolo ntambama njalo lamuhla ekuseni bekulemihlangano etshiye-tshiyeneyo, eminye ikhokhelwa ngunobhala jikelele we United Nations uMnu. Ban Ki Moon. Umongameli Robert Mugabe, okhatshwe ngabaphathintambo bengatsha ezitshiyeneyo usemhlanganweni lo njalo ukhangelelwe ukukhuluma kusasa.
Ukuhlaziya amazwi kamongameli Obama, sixoxe loMnu. Albert Mhlanga, omela iPumula edale lephalamende njalo eqhuba izifundo zePhd ezigoqela ukulondolozwa kwemvelo, ekolitshini leZambia.
UMnu. Mhlanga utshele uSithandekile Mhlanga weStudio 7 ukuthi zinengi inhlelo okufanele zisungulwe eZimbabwe ngenjongo yokulondoloza ezemvelo.
