Odokotela bathi isimo esisezibhedlela silokhu sisibi kakhulu, njengoba abanye babo kanye labongi bakhalala umsebenzi kunyanga ezedluleyo befuna ukwengezelelwa iholo lokunikezwa impahla zokuzivikela kugcikwane leCOVID 19 nxa besemsebenzini.
UDr. Mthabisi Anele Bhebhe, owayengunobhala jikelele wenhlanganiso ye Zimbabwe Hospitals Doctors Association, uthi okunye okusilelayo ezibhedlela ngamaphilisi kanye lemitshina eminengi-nengi, egoqela eyokuhlola abantu ukuthi balegcikwane leCOVID 19 kumbe hatshi.
Lokhu kwenzakala isiphathamandla sikahulumende uNkosikazi Sithembiso Nyoni esanda ukutshela lumsakazo ukuthi uhulumende usebenza gadalala ukulungisa isimo esisezibhedlela, njalo ukukhethwa kukamsekeli kamongameli uMnu. Constantino Chiwenga ukuthi abengumphathintambo wezempilakahle kanye loMnu. David Parirenyatwa ukuthi abengumabhalane walolugatsha kuzaphathisa kuloluhlelo.
UDokotela Bhebhe uthi okudanisayo yikuthi ezinye izigulane ziyatshona ngenxa yokusilela kwabodokotela, kukanti labanye abebutho abayake bebekhona abatholakali ezibhedlela.
