UMongameli weMelika uMnu Donald Trump uqale njalo imihlangano yakhe yokukhankasela ukhetho ngoMvulo ngemva kokubanjwa ngumkhuhlane weCovid-19.
UTrump ube lomhlangano esabelweni seFlorida lapho akhuthaze khona uzulu ukuti amvotele ukuze anqobe uMnu Joe Biden yena athi uzabulala ilizwe engaba ngumongameli.
UMnu Biden yena ubekhankasa esabelweni seCincinnati lapho akhuthaze khona uzulu laye ukuthi amvotele kukhitshwe uTrump embusweni.
Uthe uTrump akazihluphi ngabantu, ngakho kumele ahambe.
Kusenjalo, idale leCongress elaphezulu eleSenate liqale ukubuzisisa okhethwe nguTrump ukuthi abe ngumahluleli weSupreme Court izolo uNkosikazi Amy Coney Barrett.
Abebandla eliphikisayo elamaDemocrats bamsolile besithi engangena kulesisikhundla ulakho ukwesula umthetho wezempilakahle ovikela abanengi oweAffordable Care Act owaziwa njalo ngokuthi Obama Care.
Bathe njalo ukukhethwa kukaBarrett nguMongameli Trump kumele kwesulwe ukuze umahluli ozangena kulesosikhundla akhethwe nguMongameli ozanqoba kukhetho oluzakwenziwa mhlaka 3 ngoLwezi.
Kodwa amaRepublicans athe kumele angene kulesisikhundla ngoba uTrump elelungelo lokumkhetha.
Yena uNkosikazi Barrett uthe engapasiswa lidale leSenate angene enkantolo yeSupreme Court uzakwahlulela amacala onke ngokulinganayo engathathi hlangothi.
Isizalwane seZimbabwe esihlala eOhio uMnu Tim Muringai utshele iStudio 7 ukuthi njengoba amaDemocrats engelawo amaSenators aneleyo okuvimba uBarrett, ubona ukukhethwa kwakhe kuzaphumelela.
