amalinks wokungena

Breaking News

Omele iBhilithane eZimbabwe Uthi Izijeziso Zenotho Ezafakelwa Abe ZANU-PF Kazibhidlizi Inotho Yelizwe


Omele iBhilithane kwele Zimbabwe uNkosikazi Deborah Bronnert uthi kungamanga ukuthi izijeziso zenotho ezafakelwa uMongameli Robert Mugabe labanye bakhe zibhidliza inotho ye Zimbabwe.

Unkosikazi Bronnert ubikwa etshele intathelizindaba koBulawayo ukuthi kuyamangalisa ukuthi izijeziso lezi ezethulelwe abantu abalutshwana zingabhidliza inotho ye Zimbabwe.

Uphinde wathi impahla ethengiselwane phakathi kwamazwe la womabili okwenyanga ezinhlanu zomnyaka lonyaka ziveza ukuthi ubudlelwano bomnotho phakathi kwe Zimbabwe le Bhilithane bukhuphuke ngesilinganiso sokungamatshumi ayisitshiyangalo mbili ekhulwini.

Uphinde wathi kumele ababusayo bahloniphe isivumelwano seGlobal Political Agreement ukwenzela ukuthi ele Bhilithane lisebenzelane kahle le Zimbabwe.

Izijeziso zenotho lezi zafakwa ngenxa yokuthi uMmongameli Mugabe labanye bakhe bacatshangelwa ukutha bala ukusuka embusweni bedliwe kukhetho libandla le MDC njalo babengahloniphi amalungelo oluntu.

Isikhulumeli sebandla le ZANU PF uMnu. Rugare Gumbo uthi okukhulunywa nguNkosikazi Bronnert kungamanga.

Ingcwethi kwezombusazwe uMnu. Nkululeko Sibanda ose Huddersfield University kwele Bhilithane uthi izijeziso zenotho zithwalise nzima abalandeli bebandla le ZANU PF loba nje izijeziso ezinje zingajayelanga ukubhidliza inotho yelizwe.

XS
SM
MD
LG