WASHINGTON —
Inhlanganiso yeBulawayo Progressive Residents Association ithi ikhuthaza uhulumende ukuthi ancedise abanini bamavinkili agqekeziweyo kwamanye amalokitshi alelidolobho ukwenzela ukuthi asungule umsebenzi.
Izitolo emalokitshini zilokhu zivaliwe kulandela ingxabangxoza ebekhona elizweni inengi lihlezi ezindlini lingayi emsebenzini kumbe ezikolo ngendlela yokutshengisela zisola ukuqonga kwentengo yamafutha ezimota awokuhambisa, lokunye okuhluphayo kwezomnotho welizwe.
UMnu. Melusi Moyo, umabhalane obona ngenhlelo eziphathelande lamabhizimusi kulinhlanganiso uthi inengi labantu lithenga ukudla emavinkilini ambalwa avuliweyo emadolobheni, ngesikhathi imota zokuhambisa zisilela njalo lemali yokuzibhadala isikhuphukile.