Umpathintambo wezemali uMnu. Tendai Biti uthi osomabhizimusi abanengi eZimbabwe yibo ababulala inotho yelizwe njengoba bekhweza kungelasizatho intengo yempahla etshiyeneyo.
U Biti uthi kukhanya njalo kulamankampani labantu makhaza abahlezi phezu kwemigodi engakenjiwa elenotho eyesabekayo osokwenze ukuthi ilizwe lingatholi lutho emsebenzini wezenjiwayo.
Ngakho-ke uBiti uthi sokumele ukuthi osomabhizimusi laba baguqule izenzo zabo ngokukhweza intengo yempahla ngesilinganiso esingabulali lizwe.
U Biti uthi bazathathelwa amanyathelo nxa uhulumende engabumba umthetho ophathelane lezemigodi.
Uphinde wathi njengoba abantu makhaza bengenelisi ukuthola inzuzo kulokho okwenjiwayo, uhulumende usecabange ukukhweza imithelo emsebenzinini yezenjiwayo ukwenzela ukubuthanisa imali yothuthukisa inotho.
Umnu. Masimba Kuchera ingcwethi ecubungula ezenotho utshele uGibbs Dube we Studio 7 ukuthi uBiti uhlala ekhuluma ngodaba lwemigodi engenjiwayo olulakho ukwenza impilo yakhe ibenzima nxa efuna ukuthi imigodi le ithathelwe abanikazi.
