Inengi labosomabhizimusi lithi inzuzo eliyitholayo ilokhu iqhubeka incipha ngenxa yokusilela kwemali yakwamanye amazwe, osokubambe abanye ngamandla ukuthi bevale amabhizimusi abo kumbe bengasawavuli nsuku-zonke.
Ngakwelinye icele, uMongameli Emmerson Mnangagwa uthi uhulumende usalungisa umthetho ozabamba ngamandla osomabhizimusi abathola imali yakwamanye amazwe kuye ukuthi bathengise impahla zabo ngemali yama bond notes.
Lokhu kwenzakala izisebenzi zikhala ngokuthi zifuna iholo lazo ngemali yakwamanye amazwe ngoba kuyiyo ekhalazwa endaweni ezinengi, kukanti ama bond notes awaselamandla.
Umnini wamavinkili, uMnu. Melusi Moyo, ongumabhalane obona ngokuqhutshwa kwamabhizimusi kunhlanganiso elwela amalungelo ezakhamizi eyeBulawayo Progressive Residents Association uthi umumo womnotho welizwe ubangela ukuthi impilo ibelukhuni kubosomabhizimusi kanye labathenga impahla zabo.
