Osomabhizimusi kanye labacubungula ezenotho bathi umthelo werayisi uhulumende athi kumele uhlawulwe ngamankampani kubuyelwa emuva kumnyaka ka2017 uzabulala amabhizimusi njalo ulimaze labathengi.
Umphathintambo wezemali uMnu Mthuli Ncube uthi abathengisa kumbe ukuwoda irayisi phandle kwelizwe kumele babhadale umthelo wesilinganiso setshumi lanhlanu ekhulwini, 15 percent.
Kodwa inhlanganiso yeConfederation of Zimbabwe Retailers ithi kumele uhulumende esule lumthelo ngoba uzabangela ukuthi amabhizimusi amanengi avalwe.
Ithi kulomunye usomabhizimusi osetshelwe yiZIMRA ukuthi kumele ebhadale imali edlula US$400,000.
Umphathintambo walinhlanganiso uMnu Denford Mutashu uthi njalo umthelo lo uzaba lomthelela omubi kuzulu ngoba osomabhizimusi bazakhweza intengo yezinto ukuze bayithole limali.
La ngamazwi agcizelelwe yisikhulumeli senhlanganiso emela abathengi iNational Concumer Rights Association uMnu Effie Dlela Ncube Kanye lengcwethi kwezenotho uMnu Reggie Shoko.
Unobhala jikelele weZCTU uMnu Japhet Moyo yena uthi kuyadanisa ukubona uhulumende egijimisa imithelo kakhulu zona izisebenzi zivele zihola imali ephansi.
Lanxa umphathintambo wezemali esithi uhulumende kabuyeli muva kuloludaba, inhlanganiso yeConfederation of Zimbabwe Retailers ithi isicele uMongameli Emmerson Mnangagwa ukuthi angenele.
