Odokotela babika ukuthi omunye wabo, uDokotela Peter Magombeyi, okucatshangelwa ukuthi ubethunjwe ngabadlelana lohulumende waseziveza izolo kusihlwa eNyabira duzane leHarare, kukhanya engani uhlatshwe amajekiseni alakho ukuthi engenelisi ukucabanga kahle ngokumehlelayo.
Okwamanje uselaliswe esibhedlela seAvenues Clinic eHarare lapho ayelatshwa khona.
Odokotela abakhulume lomsakazo weStudio 7, abangafisanga ukuthi siveze amagama abo, bathi kukhanya engani uDokotela Magombeyi ulakho ukulahlekelwa yimicabango nxa ehlatshwe amajekiseni alomuthi ophazamisa ingqondo yomuntu.
Baphinde bathi kukhanya elamatshisela emzimbeni aveza ukuthi watshiswa ngomlilo kagetsi. Kasenelisanga ukukhuluma laye kanye labodokotela abamhlolileyo ngodaba lolu njalo leziphathamandla zikahulumende.
UMnu. Joseph Tshuma okubandla leZanu PF uthi kukhona okutshaya amanzi amanyama ngokuthunjwa kuka Dokotela Magombeyi.
UTshuma uthi kungani umakhalekhukhwini kadokotela ebelokhu elomlilo kagetsi yena eselesikhathi wathunjwa ngabantu abangaziwayo.
Kodwa abanye bathi uhulumende nguye olabantu akade bethumbe uDokotela Magombeyi ngoba ukhanya elemvundela phakathi.