amalinks wokungena

Breaking News

UPhilani Ncube Ukhethwa Ukuba Ngumqeqetshi Omutsha Weqembu leBulawayo City


Iqembu lomdlalo wenguqu eleBulawayo City seliqhatshe uPhilani ‘Beefy’ Ncube ukuba ngumqeqetshi walo omutsha.

UNcube ulobelane isivumelwano somsebenzi esomnyaka owodwa leqembu leBulawayo City njalo uzancediswa nguFarai Tawachera Mbewe onguye umsekeli kamqeqetshi wakuqala kanye loGolding Dube ongumsekeli kamqeqetshi wesibili.

Umqeqetshi wabonozinti omutsha oweqembu leBulawayo City nguDaniel Khumalo yena obesebenzela iqembu leFC Platinum eminyakeni eyedluleyo.

Abaqeqetshi babadlali abasakhulayo abeqembu leBulawayo City ngababalisa uJohannes Ngodzo, ongumqeqetshi wamajaha aleminyaka engaphansi kwamatshumi amabili, uInnocent Mapuranga kanye lo Bruce Tshuma bona abasebenza labafana abaleminyaka engaphansi kwetshumi lathoba minwe mbili.

UNcube uke waqeqetsha amaqembu abalisa iPigott Maskew, eleNjube Sundowns, iChicken Inn, eleHow Mine kanye lele Harare City.

Isikhulumeli seqembu leBulawayo City, uThandiwe Moyo, utshele umsakazo weStudio 7 ukuba iqembu leli lizaqala ngeviki ezayo amalungiselelo alo alonyaka.

“Amalungiselelo azaqala ngoMvulo ozayo kusukela ngehola letshumi ekuseni njalo bonke abadlali abafuna ukuzodinga umsebenzi bangabuya esikolo seSt. Columbus. Khona sizalitshela ukuba abadlali esiqhubeka labo ngobani njengoba phela abanye babo izivumelwano zabo lathi besezifike emaphethelweni kodwa esingakutsho khathesi yikuthi abadlali abahlanu abasakhulayo bazavela kuqembu lethu ebelidlala kusigaba seZIFA Bulawayo Province Division 3.”

UPhilani Ncube nguye ongenise iqembu leBulawayo City kusigaba seCastle Lager Premier Soccer League ngomnyaka ka2016 ngemva kokuba bephakamise isicoco seSouthern Region Division One Soccer League ekupheleni kwesizini ngo2015.

Iqembu leBulawayo City lidlale okweminyaka emibili kusigaba sePSL kusigaba saphezulu laseligunyulwa ekupheleni kwesizini ka 2018.

Ngalesosikhathi beselehlukane loPhilani Ncube njalo lidlale umnyaka owodwa kusigaba se Southern Region lenelisa ukuphanga liphenduke ngemva kokuphakamisa isicoco ngoba seliphutshe liphezu kwengalane yemiklomelo ekupheleni kwesizini.

Umqeqetshi ongenise iqembu leBulawayo City kusigaba sePSL lonyaka nguTry Ncube yena ongela amaphepha adingakalayo ukuba aqeqetshe kusigaba saphezulu.

Abaqeqetshi abaqhube izifundo zika CAF A yibo abalelungelo elokuqeqetsha kusigaba sePSL njalo uTry yena uphethe izithupha zika CAF B.

UTry ubengumsekeli kaPhilani ngesikhathi iqembu leBulawayo City liqala ukungena kusigaba saphezulu njalo ubikwa esebuyele njalo kusigaba seSouthern Region Division One Soccer League lapho aseqhatshwe khona liqembu leHwange.

Iqembu leHwange ligunyulwe kusigaba saphezulu ekupheleni kwanyakenye.

Iqembu leBulawayo City Selilomqeqetshi Omutsha
please wait

No media source currently available

0:00 0:02:33 0:00



Facebook Forum

XS
SM
MD
LG