Abancintisa kukhetho lokudinga umongameli olwedluleyo abakuhlelo lokukhulumisana lohulumende kudingwa isisombululo sokuhluphayo elizweni olwePolitical Actors Dialogue (POLAD) bathi bazaxoxisana le United Nations, World Bank, International Monetory Fund, kanye lamazwe aphetsheya ngokuthi kukhutshwe izijeziso ezetheswa inkokheli zebandla leZANU PF ngele Melika kanye lomanyano weEuropean Union.
Lokhu kuvezwe ngumgcinisihlalo weNational Peace and Reconciliation Commission uMnu. Sello Nare, obeqoqe umhlangano wePOLAD eNyanga, wona oqalise ngempelaviki waphela ngoLwesithathu.
UMnu. Khaliphani Phugeni, isiphathamandla sebandla leMDC-T, eliphatheka kuPOLAD, utshele iStudio 7 ukuthi umsebenzi owenziwa yiPOLAD uqakathekile njalo unconywa ngumanyano weAfrican Union, United Nations, SADC, lamanye amazwe.
UMnu. Phugeni uqhubeke wathi ukuxoxisana kuhlelo lwe POLAD yiyo indlela engeladlakela eyokucubungula okuhluphayo elizweni ukwenzela ukuthi kulungisiswe, abantu bengalahlekelwanga yimpilo kumbe balimala.
Kodwa uMnu. Nkululeko Sibanda, isikhulumeli somkhokheli webandla leMDC uMnu. Nelson Chamisa uthi iPOLAD itshaphaza imali yelizwe njalo akukho okumqoka engakufeza.
