Iqembu le Ngezi Platinum liqhubekela phambili ngokunqoba njengoba ngoLwesithathu litshaye ele Chapungu nge 1 ka nya emdlalweni obusenkundleni ye Ascot.
Ohlohlele iqembu leNgezi nguWalter Mukanga njalo limpumela itsho ukuba leliqembu selilemiklomelo engamatshumi amathathu lanhlanu ngemva kwemidlalo elitshumi lantathu.
Kweminye imidlalo edlalwe namhla iqembu le CAPS United linqobe ele ZPC Kariba nge 3 ka nya emdlalweni obuse National Sports Stadium njalo lihlohlelwe ngu John Zhuwawo olitshayele kabili emambuleni kanye lo Denver Mukamba.
Limpumela itshiye iqembu le CAPS selilemiklomelo engamatshumi amabili lisendaweni yesithupha.
Iqembu le Chicken Inn linqobe ele Bulawayo Chiefs nge 2 ka nya enkundleni ye Luveve njalo selihlezi endaweni yesithathu engalaneni yemiklomelo lilemiklomelo engamatshumi amabili lane okulinani eliphethwe liqembu le Harare City elitshaye ele Shabanie Mine nge 2 ka 1 enkundleni ye Rufaro.
Ekhuluma lentathelizindaba zemidlalo umqeqetshi weqembu le Chicken Inn uJoey Antipas utshayele ihlombe abafana bakhe ngokunqoba abakwenze iqembu le Bulawayo Chiefs.
Umqeqetshi weqembu le Bulawayo Chiefs, uGarthly Chipuka, uthe abafana bakhe bakhulelwe ngoba bebatsha kusigaba se Premier Soccer League.
Imidlalo yeviki letshumi lantathu iqhubekela phambili ngoLwesine njalo amaqembu azadlala ngokulandelayo.
Iqembu le Herentala lizemukela ele Triangle enkundleni ye National Sports Stadium ngehola lakuqala emini kuthi iqembu le Yadah lizadlala lele Mutare City ngase National Sports Stadium ngehola lesithathu emini.
Iqembu le Bulawayo City lizadibana lele Highlanders ngase Barbourfields, iqembu le Black Rhinos lizadlala lele Dynamos ngase Rufaro kuthi iqembu le FC Platinum lizadlala lele Nichrut ngase Mandava.