Ingcitshi kwezemikhuhlane zithi zikhathazekile kakhulu ngokukhwela kwenani labantu abalomkhakha womkhuhlane weTB ongelaphekiyo kalula ngemithi ejwayelekileyo.
Le yinto esiyengeze umthwalo kwezempilakahle eZimbabwe zona ezivele zithwele kanzima ngenxa yokuntengantenga komnotho.
Ngomnyaka ka2015 abantu abahlaselwa yilumkhakha weTB koBulawayo bedlula amatshumi ayisikhombisa kodwa ngo2016 inani leli likhwelile laya kumatshumi ayisitshiyagalombili lanhlanu.
Elizweni leZimbabwe jikelele bebeyinkulungwane eyodwa lamakhulu amathathu, kutsho inhlanganiso yeWorld Health Organisation (WHO).
Lumkhakha owaziwa ngesingisi ngokuthi yiDrug Resistant TB, luhlobo lweTB eyehlula ukwelatshwa ngemithi yeTB ekhona, kuze kudingeke ukuthi kuhlanganiswe imithi embalwa kanti abanye vele kuhle kwehlule ukuthi yelapheke umuntu aze acine esifa.
Ingcitshi kwezomkhuhlane weTB kunhlanganiso yeRight to Care uNkosazana Lucy Connel uthi ukwanda kwabahlaselwa yiloluhlobo lweTB sekulethe ukukhathazeka okukhulu kwabezempilakahle emazweni amanengi.
“Kufanele kwehliswe isikhathi esithathwayo ukuthi umuntu ahlolwe ukuthi uleTB loba hatshi, ukuze abalayo baphangise baqale ukwelatshwa,” kutsho uConnel.
“Kudingeka indlela njalo zokukhetha amaphilisi asebenzayo ekwelapheni lumkhuhlane kantike kufanele kudingwe njalo indlela zokuthi imithi yokwelapha iTB isebenziseke lula kuzigulane ukuze zikuthakazelele ukuthatha limithi zize zisile.”
Isizalwane seZimbabwe uMnu Innocent Sibanda uthi okwenza impumela yokumemetheka komkhuhlane we TB eZimbabwe ibembi kakhulu yikuthi lezomnotho azimanga kahle, okuyinto ehlukumeza kakhulu labo abalalumkhuhlane kuphinde futhi kwandise lamathuba okuwuthola kulabo abangakabi lawo.
“Nxa umuntu esegulela ukufa ngeTB, evele engasebenzi kunciphisa amathuba okuthi avuke ayeziphandela laye njengabanengi. Lokhu kwenza ukuthi yena lemuli yakhe bonke badle imbuya ngoluthi,” kutsho uMnu Sibanda.