Ibhanga elikhulu lelizwe eleReserve Bank of Zimbabwe (RBZ) lithi lizajezisa amabhizimusi athengisa ngentengo egxile kusilinganiso sokutshintshwa kwemali, i-exchange rate, yomkambo wensitha ebiza US$1: Z$200.
Lesi yiso isilinganiso esesisetshenziswa ngamabhizimusi amanengi ngitsho lezinye ingatsha zikahulumende ngenxa yokugugudeka kwedola leZimbabwe.
Kumbiko eliwethule ngoLwesine, lelibhanga lithe ugatsha lwalo olukhangelane lamacala okutshaphazwa kwemali, olweFinancial Intelligence Unit luphakathi kokuqhuba uphenyo ngenjongo yokujezisa izephulamthetho.
Uhulumende uthi amabhizimusi kumele asebenzise i-exchange rate yakhe eyeUS$1: Z$88.
Umphathintambo wezemali uMnu Mthuli Ncube laye wethule umbiko esithi amabhizimusi azatholakala ethengisa ngentengo egxile kusilinganiso somkambo wensitha azathathelwa amalayisensi.
Kodwa usomabhizimusi wakoBulawayo uMnu Aleck Ndlovu utshele iStudio 7 ukuthi uhulumende kumele akunanzelele ukuthi isilinganiso seUS$1: Z$88 esihlelwe yiRBZ akuselamuntu osilandelayo.
Ingcwethi kwezenotho uMnu Reggie Shoko yena uthe lanxa kusobala ukuthi uhulumende uzama ukulungisisa umnotho, kumle avume ukuthi isilinganiso sakhe asisebenzi ngenxa yokulahlekelwa luhlonzi kwemali yeZimbabwe.