Ibhanga elikhulu leReserve Bank of Zimbabwe selihlehlele emuva kusinqumo salo sokumisa inhlelo ze cash-in-cash-out-cash-back, lisithi solungaqhubeka kodwa kungasetshenziswa imali edlula amadola alikhulu- 100 dollars ngasikhathi sinye.
Ugatsha lweEcocash, lusebenzisa inkampani yalo yeCassava Smartech, beselukuphikisa emthethwandaba inyathelo leRBZ njalo lukhalaze imvumo yokuthi abasebenza kulezinhlelo beqhubeke nxa ibhanga leRBZ lingakaphikisi isinqumo salo.
Embikweni owethulwe ngoLwesithathu ntambama, usibalukhulu walelibhanga uMnu. John Mangudya uthi i-RBZ kanye lamankampani aphatheke kulokudaba asefake imigoqo ethile, njalo bazajezisa abayephulayo besenza inkohlakalo, yona ebisibhahile kuloluhlelo.
Uthi i-RBZ izengezelela imali kumnotho welizwe ukwenzela ukuthi uma amabhanga entshintsha ama RTGS ukuthi abeyimali uqobo, asebenzise isilinganiso esifana lesisindo sayo iRTGS ukwenzela ukuthi kungaguquli inani lemali engezelelwe nguhulumende.
UMnu.Thembelani Dube, isiphathamandla senhlanganiso yeBulawayo Progressive Residents Association uthi ukumisa ama cash-in-cash-out bekuvele kulinyathelo elibi ngoba inengi lithembele kuwo ukuthola imali ibambekayo.
