Inhlanganiso elwela amalungelo ezakhamizi eye Bulawayo Progressive Residents Association ithi kunengi ekufezileyo eminyakeni edluleyo, okugoqela ukukhankasela ukuthi uhulumende engabeki amakhansila akhe kubomanisipala ama special interest councillors ngomnyaka ka 2012, kodwa ayekele abantu bezikhethele.
Lokhu kuvezwe ngeNsonto ntambama inhlanganiso le iqhuba ukhetho lokudinga inkokheli entsha. Inengi libuyele ezikhundleni zazo.
Isiphathamandla salinhlanganiso uMnu. Ambrose Sibindi ulandule imbiko ethi inhlanganiso yakhe ihlezi ikhankasela ibandla le MDC-T esithi ayithathi hlangothi kwezombusazwe ngoba inkokheli yayo igoqela amalunga amabandla ezombusazwe atshiyeneyo kanye labezokholo lwesiKristu.
UMnu. Sibindi uchasisele uSithandekile Mhlanga weStudio 7 okunengi osokwafezwa yinhlanganiso yakhe, okugoqela ukukhuthaza izakhamizi ukuthi ziphatheke kwezombusazwe.
