Sokubhubhe abantu abangamatshumi ayisithupha lanhlanu, 65 kungozi yezulu lesiphepha, uCyclone Idai esigabeni seManicaland.
Abazinkulungwane ezimbalwa babikwa bengaziwa ukuthi bangaphi. Abanye babikwa besinde ngokukhwela phezu kwezindlu kumbe ezintabeni lapho abangafinyelwa khona ngamanzi asekhukhule amabholoho awisa lezihlala lezakhiwo.
Lokhu kwenzakala umongameli emmerson mnangagwa esithi usephule uhambo lwakhe lwe abudhabi aphenduke ekhaya.
Sixoxe lesiphathamandla sogatsha oluvikela uzulu engozini, olwe Civil Protection Unit, uNkosazana Sibusisiwe Ndlovu oke wayafika eManicaland ukuyabona umonakalo odalwe ngu Cyclone Idai.
Kunjalo nje, iqula labaphathintambo baka hulumende abane, oMnu. July Moyo, Perence shiri, Joel Biggie Matiza, loNkosikazi Sekesai Nzenza baphendukele endleleni bezama ukuya emanicaland ukuyazibonela ukuthi umumo unjani.
Imota kade zithwele abaphathintambo laba zibikwa zibhajiwe edakeni kabili okubangele ukuthi baphenduke.
Lokhu kwenzakala uzulu esola uhulumende lomongameli mnangagwa ngokungalungiselelanga ingozi le lanxa abezomkhathi bakhuluma ngayo kusukela ngenyanga edluleyo.
UMnangagwa ubikwa esebenzise indizamtshina yokweboleka ebiza inkulungwane lenkulungwane zamadola emelika ngeholo linye.
Umskeli wesikhulumeli sebandla leMDC koBulawayo, uMnu. Edwin Ndlovu utshele iStudio Seven ukuthi uhulumende kanakakekele uzulu ngesikhathi sobunzima esifana lalesi.
Lokhu sikudaba lunye, izizalwane zezimbabwe elizweni laphandle zisukumele phezulu ekuphathiseni abehlelwe yingozi yezulu leli.
Kulendlela ezimbalwa ezobulembu be Internet ezisetshensiswayo ukubuthelela imali yokuphathisa.
Omunye obuthelela uncedo lokuphathisa abawelwe yingozi le nguMnu. Zenzele Ndebele owenhlanganiso ye CITE.
Sixoxe laye ukuze sizwe ukuthi ihamba njani imizamo yakhe.