Amaqembu amakhulu emdlalweni wenguqu asezibeke kusimo esihle esokudlulela kusigaba esilandelayo esomncintiswano wenkezo yeChibuku Super Cup osaqhubeka elizweni.
Kusibaya sika Group 1 iqembu le Dynamos lihlezi phezu kwengalane lilemiklomelo eyithoba minwe mbili kuthi endaweni yesibili kuleqembu le Caps United lona elilemiklomelo eyisithupha ngemva kokuba sekudlalwe imidlalo emine.
Endaweni yesithathu kuleqembu le Harare City lalo elilemiklomelo eyisithupha kuthi ele ZPC Kariba lisendaweni yesine lilemiklomelo emihlanu.
Emsileni kule Herentals le Yadah ezilemiklomelo emibili iqembu ngalinye.
Kulamaqembu ayisithupha kusibaya sika Group 1 okutsho ukuba kusele umdlalo owodwa ukuba imidlalo le ifike phakathi laphakathi.
Kusibaya sika Group 2 imidlalo isifike phakathi laphakathi njalo amaqembu sekumele aphindane umphehlo.
Ngemva kwemidlalo emithathu iqembu le Chicken Inn lele Highlanders asele ehlezi phezu kwengalane elemiklomelo eyisikhombisa iqembu ngalinye njalo ele Chicken Inn lihlezi esiqongweni ngoba lihlohle amagoli amanengi.
Umqeqetshi weqembu le Highlanders uMandla Mpofu uthi bangene kulumdlalo bengazange bathole ithuba elokulungisisa amaphutha abagadli babo ngoba abadlali bebekhalala umsebenzi bekhonona ngeholo.
Kusibaya sika Group 4 iqembu le Ngezi Platinum Stars yilo elihlezi phezu kwengalane lilemiklomelo eyithoba munwe munye ngemva kwemidlalo emithathu.
Endaweni yesibili kuleqembu le FC Platinum lona lilemiklomelo eyisithupha.
Iqembu le Ngezi lidinga ukuba linqobe kanye kuphela nxa amaqembu esephindana umphehlo ukuze lizithole selidlulele kusigaba esilandelayo esomncintiswano lo oweChibuku Super Cup.
Phansi kwengalane kuleqembu le Triangle kanye lele Whawha wona alomklomelo owodwa iqembu ngalinye.
Kusibaya sika Group 3 yiloba yiliphi iqembu lingadlulela kusigaba esilandelayo njengoba phezu kwengalane kuhlezi iqembu le Cranborne Bullets elilemiklomelo emihlanu kuthi ngemva kwalo kulamaqembu abalisa ele Black Rhinos kanye lele Tenax alemiklomelo emine iqembu ngalinye.
Emsileni wengalane kuhlezi iqembu le Manica Diamonds elilemiklomelo emithathu.
