amalinks wokungena

Breaking News

Sekuliphelele Emidlalweni yeCAF iqembu Lenguqu eleTriangle


Umqeqetshi weqembu lenguqu eleTriangle United uTawurayi Mangwiro uthi bafunde okunengi ngokuphatheka kwabo kumncintiswano wenkezo yeCAF Confederation Cup loba nje bengasafinyelelanga ukungena kumidlalo yezibaya.

Iqembu le Triangle liphelelwe ngumphako ngemva kokunqotshwa ngele Nouadhibou elase Mauritania.

Lawamaqembu adibane kumidlalo emibili eyesigaba se play - off njalo ele Nouadhibou linqobe ele Triangle nge 2 ka nya emdlalweni wakuqala kuthi owesibili odlalelwe enkundleni ye Barbourfields ngeSonto uphele iqembu le Triangle linqobe nge 3 ka 2 .

Limpumela itsho ukuba iqembu le Nouadhibou linqobe ele Triangle nge 4 ka 3 nxa sekuhlanganiswa impumela yemidlalo yomibili.

Umqeqetshi weqembu le Triangle uTawurayi Mangwiro utshele intathelizindaba zemidlalo ekupheleni komdlalo wangeSonto ukuba ukuphatheka kwabo kumncintiswano owokudinga intshantshu zezwekazi lase Africa kubavule amehlo.

“Siqhube kuhle kakhulu njengoba bekungokwakuqala ukuthi siphatheke kumidlalo eyokudinga intshantshu zezwekazi lase Africa.

Lathi njengabaqeqetshi sifunde okunengi ikakhulu ukuthi kumele sibekwazi okokwenza nxa sincindezelwa ngabonompembe ngoba kwasiphazamisa emdlalweni wehlandla lakuqala,” kutsho uMangwiro.

Iqembu le Triangle lithole ithuba elokumela ilizwe le Zimbabwe ngemva kokuba liphakamise inkezo ye Chibuku Super Cup nyakenye njalo lisasekhona ithuba elokuba leliqembu liphinde njalo liphakamise linkezo lalonyaka njengoba lizadlala lele Harare City kusigaba se quarter final ngoLwesithathu.

Uhlelo olokuba amaqembu azadlala njani kusigaba se semi - final yenkezo ye Chibuku luqhutshwe namhlanje esigodlweni iHarare njalo iqembu le Highlanders lixegwe lele ZPC Kariba kuthi ele Ngezi Platinum lizadlala lelizanqoba phakathi kweqembu le Harare City lele Triangle.

Imidlalo yesigaba se Castle Lager Premier Soccer League eyeviki lamatshumi amabili lathoba munwe munye itshiye iqembu le CAPS United lilokhu lihlezi phezu kwengalane yemiklomelo lilemiklomelo engamatshumi amahlanu lowodwa loba nje linqotshwe nge 2 ka nya liqembu le TelOne ngeSonto.

Iqembu elihlezi endaweni yesibili ele FC Platinum lalo lidibane lembila zithutha ngempelaviki eyedluleyo njengoba litshaywe nge 1 ka nya ngele Bulawayo Chiefs njalo liyale lilokhu lilemiklomelo engamatshumi amane lathoba munwe munye.

Endaweni yesithathu kuleqembu le Chicken Inn lona elingadlalanga kulimpelaviki njengoba bekumele lidlale lele Triangle lona ebeliphatheke kumncintiswano we CAF Confederation Cup.

Endaweni yesine kuleqembu le ZPC Kariba lona elilemiklomelo engamatshumi amane lanhlanu njalo elinqobe ele Black Rhinos nge 1 ka nya ngeSonto.

Umdlalo obuphakathi kwamaqembu amakhulu elizweni athi ele Dynamos kanye lele Highlanders uphele zingutshiki lobhanqa 1 ka 1 njalo umqeqetshi weqembu le Highlanders uHendrik Pieter de Jongh ukhale ngesimo senkundla ye Rufaro sona athe asilungelanga ukudlalela amaqembu adlala kusigaba saphezulu.

“Umdlalo wenguqu ngumdlalo owokukholisisa abalandeli bomdlalo wenguqu kungakhathalekile ukuba ngabaliphi iqembu kodwa isimo senkundla ye Rufaro asilungelanga ukuba kudlalelwe umdlalo wenguqu okokuthi lenja yami imbala ayingeke idlalele enkundleni efana lale.

Isimo salinkundla asilunganga, asemukeleki ngempela,” kutsho uDe Jongh.

Emsileni wengalane siqhubekela phambili isipunepune sokuzama ukusinda ekugunyulweni kusigaba saphezulu njalo iqembu elijeke amanye engalaneni ele Yadah linqobe ele Chapungu nge 1 ka nya lakhuphula inani lemiklomelo elilayo laya kumatshumi amabili lathoba mine mbili.

Endaweni yesibili nxa usuka emsileni kuleqembu le Mushowani Stars lona elinqotshwe nge 1 ka nya ngele Hwange njalo elilemiklomelo engamatshumi amathathu kuthi ele Hwange lihlezi endaweni yesithathu nxa usuka phansi lilemiklomelo engamatshumi amathathu lowodwa.

Endaweni yesine nsa usuka emsileni kuleqembu le Herentals lona elilemiklomelo engamatshumi amathathu lowodwa kuthi phezu kwalo kuleqembu le TelOne elihlezi endaweni yetshumi lane lilemiklomelo engamatshumi amathathu lambili ikanti ele Bulawayo Chiefs lihlezi endaweni yetshumi lantathu lilemiklomelo engamatshumi amathathu lane.

Iqembu elimela ilizwe le South Africa emdlaweni we rugby lona elaziwa kakhulu ngegama elithi Springboks yilo eletheswe inkatha eyokuba zintshantshu zomhlaba jikelele ngemva kokunqoba ele England nge 32 ka 12 ku final eyomncintiswano wezizwe zomhlaba ngoMgqibelo.

Omunye wabadlali beqembu le South Africa abathenjiweyo njalo laye odlale indima enkulu ekunqobeni kwalo ngumdlali oyisizalwane selizwe le Zimbabwe uTendai Mtawarira yena owaziwa ngegama elithi Beast.

Udaba lwezemidlalo siluphiwa nguJoseph Njanji
please wait

No media source currently available

0:00 0:04:04 0:00

Facebook Forum

XS
SM
MD
LG