amalinks wokungena

Breaking News

Sekusele Ukuba Zintshantshu ZaseAfrica: Sweswe


Umqeqetshi weqembu leFC Platinum uLizwe Sweswe

USweswe ukhokhele iqembu le FC Platinum laphutsha lisendaweni yakuqala engalaneni yemiklomelo kusigaba se Castle Lager Premier Soccer League ekufikeni komlindi uyacina kwemidlalo ngoMgqibelo.

Ngokwesithathu iminyaka ilandelana ukuba iqembu le FC Platinum liphakamise isicoco seligi kodwa ngokwakuqala ukuba likwenze lokhu uSweswe kunguye ozibambe esidukwini njengoba eminyakeni emibili eyedluleyo leliqembu linqobe likhokhelwa ngu Norman Mapeza.

USweswe utshele iStudio 7 ukuba ukunqoba kwakhe kuzakwenza abaqeqetshi abangazange bedlale ibhola kusigaba saphezulu bahlonitshwe ngoba bebhekane lokweyiswa okukhulu.

“Ngijabulile ukuba lokhu ngikwenzile ngimele abaqeqetshi abangaziwayo okungakhulunywa ngabo kakhulu bonke nje abenza kahle kodwa benganakwa. Banengi abafana abenza kuhle kodwa abakhangelelwa phansi njalo isifiso sami ngesokuthi ngabe ngeyinye imini bangathola ithuba labo betshengise ikhono labo,” kutsho uSweswe.

Ukunqoba kweqembu le FC Platinum kutsho ukuba langomnyaka ozayo yilo njalo elizamela ilizwe le Zimbabwe kumncintiswano we Total CAF Champions League.

Lonyaka iqembu le FC Platinum liphinde lafinyelela njalo ukungena kusigaba sezibaya salo umncintiswano kodwa kaliqhubi kuhle njengoba selinqotshwe kumidlalo emibili eseliyidlale kulesisigaba.

Loba kunjalo uSweswe uthi ngemva kokwetheswa inkatha eyokuba zintshantshu zelizwe le Zimbabwe okweminyaka emithathu ilandelana osekusele yikuba zintshantshu zezwekazi lase Africa.

“Njengomqeqetshi bengifisa ukuba ngiyale ngilokhu ngisenza kuhle amaphupho ami afezeke. Ngike nganqoba kuzigaba eziphansi obesekusele yikuba nginqobe kusigaba saphezulu ngoba iPSL phela yiyo enkulu kwele Zimbabwe.

Lase Africa lakho amaphupho ami azayala elokhu ekhona ukuthi ngeyinye imini lami kengifike ku final eye Champions League mhlawumbe ngiphakamise lenkezo. Ngamaphupho lawo njalo ngamaphupho alakho ukufezeka,” kutsho uSweswe.

Iqembu le FC Platinum liphutshe imidlalo yalonyaka lilemiklomelo engamatshumi ayisithupha lambili kuthi endaweni yesibili kuleqembu le Chicken Inn lona eliqede lilemiklomelo engamatshumi amahlanu lathoba munwe munye.

Iqembu le Caps United lona elikhokhele okwesikhathi eside liphezu kwengalane yemiklomelo liphutshe lisendaweni yesithathu lilemiklomelo engamatshumi amahlanu lathoba minwe mbili ikanti iqembu le ZPC Kariba yilo eliphutshe lisendaweni yesine lilemiklomelo engamatshumi amane lathoba munwe munye.

Iqembu le Highlanders lona liphutshe imidlalo yalonyaka lisendaweni yesihlanu lilemiklomelo engamatshumi amane lesithupha.

Emsileni wengalane amaqembu agunyulwe kusigaba saphezulu ngabalisa ele Mushowani Stars lona eliqede lilemiklomelo engamatshumi amathathu lantathu, ele Hwange lona eliqede lilemiklomelo engamatshumi amathathu lesikhombisa, ele TelOne kanye lele Chapungu wona aqede elemiklomelo engamatshumi amane.

Amaqembu azabe azathatha indawo zalawo agunyulwe kusigaba saphezulu ngabalisa ele Bulawayo City, ele Whawha, ele Tenax kanye lele Cranborne Bullets.

please wait

No media source currently available

0:00 0:02:51 0:00

Facebook Forum

XS
SM
MD
LG